【識港網訊】歌手李克勤嘅經典金曲《紅日》於1992年推出，到而家都唱足廿幾年，就連克勤都話首歌唱咗一萬幾千次，但近日佢喺一次演出嗰陣竟然老貓燒鬚「唔夠氣」！

原來克勤近日去咗海拔3,650米嘅拉薩做商演，表演前佢曾去咗布達拉宮觀光，單係行幾百級樓梯已經行到「頭暈暈缺氧」，點知到咗表演嗰陣仲衰，佢喺完成演出後就上載咗一段喺車上吸氧氣嘅短片，仲話首歌唱咗咁多次，就算頭暈身㷫，只要唔係大病都可以憑經驗順利過渡，更從未試過有「唔夠氣」嘅感覺：「唯獨是這一次在拉薩，唱完兩首歌還好地地，自己以為冇問題，到唱第三首《紅日》時，開頭兩段還很正常，於是唔識死開始周圍走周圍跳，點知一跳就出事，上氣唔接下氣，中間還停了一句抖（唞）氣……3,650米，真係唔係講笑，失禮晒。」

克勤坦言今次經驗好難忘，仲話如果同業有機會去拉薩唱歌，可以聯絡佢：「我有很多有趣經驗可以和大家分享。」

原文鏈接：http://www.orangenews.hk/officelady/system/2019/06/03/010118142.shtml