【識港網訊】劇集《婚內情》將喺今星期日大結局，鄧萃雯、陳錦鴻早前為拍攝趕工，日對夜對培養默契，戲外鄧萃雯不但叫陳錦鴻做「老公」，又當街打情罵俏鬧陳錦鴻阻住落車，場面搞笑！

鄧萃雯提到：「我地因為入咗角色，所以平時語氣、對白都係好寫實、好自然架啦，不過甩咗個角色就唔會叫佢老公㗎啦。（佢話你同林德信大把溫馨戲拍？）佢驚我講佢嘛，佢不知幾多拍拖戲，你有冇發現佢同每個女仔拍都有唔同節奏，小跳步個啲出晒嚟，淨係返到屋企對住我先死口死面，所以先成日借林德信嚟分散視線。」

鄧萃雯又大讚陳錦鴻貼心，會沖定茶等佢埋位，不過被佢識破陰謀：「因為錦鴻好養生，會自備茶水飲，只要我地同場就會自動自覺分一杯比我，初時我都覺好Sweet，後來就知原來我地要拍鬧交戲，每次拍唔開心場口都會有茶水飲，原來佢係一啖砂糖一啖屎，畀杯茶我氹吓我先。」

陳錦鴻亦拍畢戲份都唔願意返屋企，寧願留低監場。雯女就話對方「夠義氣」，幫手分析劇本：「佢唔係唔願返屋企，係我留住佢！我係一個問題兒童，點知我問點演呢場戲好，佢又答到，意見又唔錯，仲要有進步！我覺得自己演戲咁多年咁有經驗，竟然問完下個Take仲有進步，呢個感受係好開心！又有得搵錢，又有得拍戲，又有得學習，仲可以進步，所以每日返工好開心！」

原文鏈接：http://www.orangenews.hk/officelady/system/2019/05/30/010117884.shtml