【識港網訊】來自新疆嘅內地女星迪麗熱巴，有着立體嘅五官同飄逸嘅長髮，加上充滿異國風情嘅味道，更令佢喺短短幾年火速成為當紅嘅女星。迪麗熱巴嘅美貌獲得唔少人認證，不過佢都曾經試過「出事」，早前佢為以齊肩短髮為雜誌拍攝時就遭到劣評，被網民狠批拉低顏值。就算畀人批評，迪麗熱巴似乎唔太在意，近日為另一本雜誌《STYLE》拍攝時再挑戰更短嘅寸頭造型！

噚日（22號）《STYLE》喺官方微博上載一張迪麗熱巴嘅雜誌封面相，相中見到佢以黑色寸頭造型示人，配上間條套裝，展現英氣中性一面。到了今日，雜誌再公開兩張新相，其中一張黑白照更見迪麗熱巴着上西裝，Cool爆Chok樣望住鏡頭，相當型格。

迪麗熱巴寸頭造型曝光後，隨即喺微博惹嚟熱烈嘅討論，粉絲大讚佢有型帥氣：「太帥了，我被撩到了」、「顏值高甚麼風格都美」、「英氣十足」不過有部分網民繼續批評迪麗熱巴短髮唔掂：「不好看，還是別挑戰了」、「沒必要吹，我真覺得這個髮型不好看」、「短髮真的不適合她，好難看」評價可謂相當兩極。

原文鏈接：http://www.orangenews.hk/officelady/system/2019/05/23/010117299.shtml