【識港網訊】

陶大宇最近在內地登台唱《倒轉地球》而爆紅，日前TVB娛樂新聞台便搵了陶大宇接受訪問，他更直場示範用丹田唱《倒轉地球》，由於他將歌曲唱到街知巷聞，令人忘了原唱劉德華的版本，陶大宇就搞笑表示歉意：「首先就華哥仔，真係唔好意思，搞到你首歌咁樣，你唔會怪我嘅。」

陶大宇亦有解釋「水撥式」台風，他續稱：「咁我覺得喺現場唱歌，個反應係直接嘅，我好想做一個互動嘅感覺，所以我就設計咗一個打招呼咁樣唱，點知揮下揮下，姿勢打下打下又幾過癮喎，愈打就愈勁，出現咗呢個效果喇。開頭我都唔知係咁搞笑，睇返好多片先知原來真係好搞笑，又真係幾似嗰個水撥嘅，開心就得啦，最緊要開心。」

對於唱《倒轉地球》而爆紅，就笑言：「究竟我仲應唔應該呢，將啲歌唱得更加好呢？如果我唱得咁好嘅話呢，我就唔會有今日嘅成就。你究竟鍾意我邊一瓣先？你究竟鍾意我而家呢個版本呀，抑或要一個我將來進步一啲嘅版本先？咁我都會盡返好我自己嘅責任嘅，唔會太過離譜嘅。其實我唱歌呢，唔係咁難聽嘅，唔係而家市面上、江湖上咁樣嘅，我真係要澄清一下，我都想唱得好少少嘅，唔好令到大家有啲不必要嘅誤會啦。」

原文鏈接：https://m.orangenews.hk/details?recommendId=1131857