【識港網訊】藝人應采兒一直都揚言想生多一個，近排佢不時傳出再度懷孕，唔少人都期待佢有好消息公布。不過呢日應采兒同老公陳小春、佘詩曼（阿佘）、楊千嬅等現身澳門出席《德晉集團》春茗晚宴，陳小春受訪時被問到係咪有喜事公布，佢冇正面回應，只係話：「多謝，你哋好好心地，希望在明天。」

問到會唔會喺豬年生B？小春表示：「咩年都好，我就屬羊，太太就屬豬（囝囝Jasper想有細佬妹？）佢未識表達，但有講過想有細佬啲Friend囉！多謝大家，如有會公布。」

另外，小春提到其《STOP ANGRY巡迴演唱會》將會喺天律、武漢同埋澳門演出，但因為申請香港紅館檔期較難，如果今年申請唔到就要等到下年，佢又講笑指睇過好友鄭伊健為個唱綵排，都搞到佢心癢癢，不過佢話唔會擔任對方嘉賓，反而會同謝天華、林曉峰、錢嘉樂入場欣賞。問到會唔會積極搵老闆投資開騷？佢就話：「搵老闆唔難，開一場就難（眾籌或自資開騷？）唔使啦！我打工㗎咋！」

提到伊健個唱首場嗰陣不慎跌咪，但好淡定示意工作人員手上冇咪，小春都讚對方醒：「呢啲咪教都教唔到，喺台上要執生，型呀！我就應該未試過跌咪，試過無拉拉鏈、甩鞋，跟住好型咁跳住舞着返隻鞋。」

原文鏈接：http://www.orangenews.hk/officelady/system/2019/02/26/010110781.shtml