壽星女阿嬌哭成淚人。

【識港網訊】《TWINS SPIRIT 2024》演唱會前晚假紅館完成第五場演出，適逢鍾欣潼（阿嬌）農曆生日，萬人再次大合唱中文版《生日歌》為阿嬌祝賀，唱《相愛22年》前，阿嬌與蔡卓姸（阿Sa）深情對話部分，更是一晚比一晚感人，兩人邊唱邊喊，阿Sa邊唱邊深呼吸忍淚，阿嬌則哭到淚流滿面，而現場大班歌迷也被感動得邊唱邊落淚。

前晚阿嬌農曆生日，有歌迷扮成禮物大叫祝她生日快樂，阿嬌笑道：「嘩，你唔係送你畀我呀？我唔要得唔得呀？我唔知擺喺邊呀，我唔識點養你！」引得全場狂笑，阿Sa叫全場萬人大合唱中文版生日歌祝賀生日，氣氛歡樂高漲。之後兩人再定神，準備唱《相愛22年》，阿Sa說：「22年前真係想像不到，呢個係我哋嘅將來……」阿嬌接着說：「 第一個演唱會後，都唔知仲有冇得再開。」阿Sa說：「咁多年，有好多人可能會話，Twins好好彩，其實我哋條路一啲都唔平坦，一開始係好純粹嘅快樂，過咗幾年，就開始唔係好識笑。」阿嬌回話：「 我仲難啲，我記得一開始，Mani（經理人）不停叫我笑呀、笑呀，我真係好辛苦，到慢慢開始，好多人支持我，覺得被人重視啦，我先識笑容多咗，同你一齊又開心，打開咗自己 。」阿Sa表示：「神奇嘅地方係，我哋細個咩都唔識，由也也烏好開心開始，之後感受到好多人情冷暖， 開始自己識思考， 慢慢有幾年，真係好似笑少咗， 但係好慶幸，我哋真係好努力都走過咗呢啲階段。」阿嬌補充說：「終於嚟到呢度啦！」阿Sa認同道：「係呀！恭喜你呀！」然後兩人走向對方感動相擁，不過兩人太激動太開心，擁抱時撞向對方臉上，兩人都忍不住大笑，現場本來被感動落淚的歌迷即狂笑起來。

與歌迷相愛22年

繼而兩人再向歌迷道謝：「當然有一個元素係好重要，就係你哋！如果唔係你哋呢22 年，一路在我哋背後支撐我哋，我哋真係唔會行咁多， 多謝你哋咁多年來嘅包容，多謝你哋嘅愛。」阿Sa亦開始哽咽，哭着說：「多謝你哋所有人，喺我哋最唔好時候嘅鼓勵，真係好緊要，接着這隻歌，唔係只係講緊我同嬌，係講緊我同你哋嘅關係，相愛22年。」起歌之後，兩人也是喊着唱，阿嬌更哭到淚流滿面， 而阿Sa則不停強忍淚水，免得唱不下去。現場不少歌迷都跟着他們大合唱，並且邊唱邊落淚。

由於是阿嬌生日，前晚阿Sa就特別讓觀眾點歌，多唱一首，現場投票，最後是《士多啤梨蘋果橙》，兩人問現場觀眾借來電話睇歌詞，料不到阿Sa借來的手機，唱兩句後，電話響，她情急對觀眾大叫：「哎呀，你Daddy打畀你，死啦，點算……」阿嬌就安慰她：「唔好亂，唱埋先！」對話笑爆全場。