【識港網訊】ERROR成員郭嘉駿（193）12月14日推出第三首個人單曲《越州公路193》，內容與他獨自移民外地，靠廣東歌支持追夢的故事有關。新曲製作陣容鼎盛，由張繼聰作曲、謝安琪監製、黃偉文填詞，MV更特別找來最近回復自由身的鄭裕玲（Do姐）客串。

Do姐打扮高貴。（圖：《越州公路193》MV截圖＠YouTube）

今次MV需要一位女主角，193笑說：「MV一係冇女主角，一係就要搵個好勁嘅女主角。」而該女主角亦要高貴華麗，所以誠邀Do姐合作，他表示：「我心目中最高貴嘅就係Do姐，所以諗住碰下運氣，問吓又唔使錢，點知佢一口答應咗。之前唔夠膽問，係怕有好多合約上嘅問題，所以都廢事問，免得面懵懵被拒絕。」

MV中，Do姐坐在古董車內。（圖：《越州公路193》MV截圖＠YouTube）

為展現Do姐高貴一面， 193更找專人設計Do姐的MV造型，配上全黑服裝及閃亮鑽飾，更將私人古董車改裝成的士。「一直覺得Do姐的氣質好襯倫敦，同埋成日喺電台節目講英國皇室嘢，所以有Do姐這個似是英國皇室，但去葬禮的造型。」看到193在MV上花盡心思， Do姐笑說：「我有理由相信你係暗戀我嘅，我無以為報啦！」不過當193問到會否有更多謝禮時，Do姐即投訴說：「仲想點？我冇客串過MV，仲以為有好多對手戲，點知係冇乜。」193即解釋說：「搵到你來客串已經很好，怕太多戲份會畀Do姐拒絕。」他又笑言：「不如下次你做女主角，我哋打車輪！」

Do姐早前也出席了193的展覽。（圖：deniskwok193@IG）

這次客串其實Do姐未有收取任何酬勞，193也苦惱要如何報答對方，Do姐便表示：「家家有求，第時有嘢要幫忙，就搵你幫手。」193指就算為Do姐打掃家居也可以，因為他聽說Do姐住所很大，很想參觀一下，他更明言：「最多約埋姜濤一齊嚟。」Do姐聽到即立馬答應，更笑說：「無任歡迎，ERROR其他3個可以唔要了！」

圖：《越州公路193》MV截圖＠YouTube、deniskwok193@IG