【識港網訊】2019年對於楊柳青來說是豐收的一年，事業上成功為「武打演員」身份奠定基礎，收起拳頭於《解決師》演性感女秘書亦獲得不少知名度；愛情路上亦告別單身戀上外籍男。楊柳青視去年為一個好的開始，未來最渴望還是朝武打演員路發展，盼有日別人提到「武打演員」時自然聯想到楊柳青。

認清方向做武打演員

楊柳青起初以模特兒身份入行，然而當了幾年模特兒後面臨瓶頸位，自覺是時候為自己訂下另一目標，最後發覺渴望成為演員，但如何從眾多演員中突圍而出？她憑著自己勤力能捱的特質，嘗試接觸武打：「接觸後發現呢樣嘢冇睇電視咁有型，會損手爛腳，成個人線條唔同晒，對腳又粗，手臂又粗又瘀，唔想照鏡，覺得我究竟係咪真係要行呢條路？好彩有班朋友或自己不斷同自己講心態要唔同，因為演員同模特兒係兩樣嘢，所以不斷喺過程中慢慢去令自己行去做武打演員嘅方向。」

演性感女秘書感不自在

隨著自己的堅持不斷鍛煉，楊柳青獲得不少武打片的演出機會，不過去年她在無綫劇集《解決師》中收起拳頭，化身性感女秘書，她坦言起初接到劇本感到驚訝：「我冇去質疑或唔想拍，反而覺得幾好，畀觀眾有種新觧感或者係驚喜，原來我可以性感，始終我去營造武打演員嘅過程入面都係好堅強好硬朗、好Man好粗魯。」

然而今次飾演一個婀娜多姿、斯文和性感的秘書，楊柳青亦坦言不自在，要不斷提醒自己要溫柔和婀娜一點，還自爆有場戲講到著浴袍的她要爬上李天翔的床，豈料她真的當在自己家中，毫無儀態般爬上床：「導演同我講可唔可以婀娜啲，我話唔好意思平時我係咁樣爬，之後嚟多Take先好優美好婀娜咁爬上去，先有秘書嘅感覺。」

渴望文武雙全

既然楊柳青演武打戲較為得心應手，是否代表相比文戲較喜歡武打戲？她卻坦言因為《解決師》令心態上有所轉變：「我覺得兩樣嘢係好唔同，開頭啱啱做演員嘅時候我嘅答案一定係武打，因為我知道自己演文戲嗰方面未得，對武打係有信心好多，但經過《解決師》後，知道自己嘅問題喺邊，嚟緊想喺嗰方面改善做到最好，希望大家覺得我無論文又得武又得。」

低調處理戀情

楊柳青自覺陽剛硬朗，不過不怕嚇走桃花，認為無論她是個怎樣的人，喜歡她的人終究會喜歡她，而早前她被傳媒拍到街頭與外籍男狂咀，楊柳青亦大方承認正與對方交往：「其實我唔想咁快公開，因為想穩定咗先，不過既然影到我都唔介意同大家分享。」楊柳青坦言感情穩定後才公開會有較大的安全感，加上另一半並非圈中人要保護對方，所以希望低調處理戀情，又笑言已經過了年輕時拍拖要到處宣揚的年紀。

談到現任男友，楊柳青表示對方能接受她所有東西，無論是私下不打扮，抑或個性較粗魯：「可能係外國人嘅關係，加上佢覺得咁樣仲舒服，因為佢會覺得我平時拍嘢要扮唔同人嘅時候好攰，如果私下對住鍾意嘅人都要去扮另一個人嘅時候，其實呢段關係唔係咁真同埋投入，對住自己鍾意嘅人通常都係做返自己係最好。」

盼提武打演員會聯想到楊柳青

不少人在每年都會為自己訂下不同目標，楊柳青亦不例外：「我每年都會訂立10幾個大大小小嘅目標，到年尾就會剔自己做到幾多，令我好有動力去做每一件事。」回顧剛過去的2019年，楊柳青認為去年是個好的開始：「其中一個係令大家都認識楊柳青——武打演員，呢兩樣嘢係有關聯，到目前為止我係滿意嘅，第二就係想有作品令人有印象同認同，我好開心《解決師》播出後反應好好，《催眠．裁決》做殺手嘅角色評價都幾好，所以無論電影電視都希望每次畀到大家唔同新鮮感同進步。」

至於今年的目標，楊柳青希望繼續往武打演員路發展，在武打演員上站穩陣腳，盼有一日別人想起的武打演員會是「楊柳青」。

鳴謝：Barry@relaxdearhk
場地：Nexus

原文鏈接：http://www.orangenews.hk/officelady/system/2019/12/27/010135332.shtml