【識港網訊】歌手J.Arie（雷心如）入行第六年，2019年是她破釜沉舟再重新出發之年，拍劇出新歌，受到網友熱愛。她表示：「我入行真係冇諗過要做明星，我只係想做一個可以日日唱歌同埋對住音樂嘅人。」

有人會覺得J.Arie讀法律出身，一定家境富裕，但她提到：「只可以話我父母而家生活得安穩就好啦，我唔會用屋企嘅一分一毫去養活自己。我自己賺幾多就洗幾多，每一分錢必須要用自己的一雙手黎賺返嚟。同埋假設就算有另一半，我都唔會鍾意洗男人錢！」

做新人初時十分難捱，收入不多，J.Arie回憶：「所以尤其新人之後嗰幾年好難捱，基本上都係搣緊新人頭嗰兩年賺返嚟嘅錢，亦都有諗有乜嘢part-time job做，幫補下生活費。試過去大學教唱歌同教琴，再幫學生補習。平時好少會買衫，只會借衫，畢竟藝人出鏡嘅衫只可以着三次，報紙、雜誌、電視各一次。前幾年真係感覺到無力感好重，好氣餒，好似覺得自己明明已經塞爆晒schedule，但又唔係有好大滿足感成就感，又仲未係好供給到生活。」

不過天生樂觀的J.Arie沒有氣餒，對住音樂她仍然沒有放棄：「近呢一兩年我諗通咗啦，其實如果我係鍾意音樂嘅話，我所有精神同時間都應該畀晒同音樂有關嘅嘢！其實音樂唔一定係要寫歌比自己唱！可以寫歌成就其他歌手，或者用其他藝術方式呈現㗎嘛！今年竟然係以音樂形式參與到電影《獅子山上》嘅配樂同主題曲演繹。今年仲可以幸運地寫到一隻三台冠軍歌《Dream my Dreams》俾黃淑蔓，原來見到另一位歌手演繹自己寫嘅作品係咁驚喜同埋咁有成就感嘅！我會繼續發掘唔同可以展現音樂嘅藝術方式。做音樂真係唔係賺到好多錢，但係佢餵飽我嘅精神同我嘅靈魂，所以相對地，食少啲着平啲係心甘情願！」

原文鏈接：http://www.orangenews.hk/officelady/system/2019/12/02/010133249.shtml