【識港網訊】藝人盧宛茵曾經喺無綫處境劇《愛．回家之開心速遞》客串飾演「崔Auntie」，憑住尖酸刻薄嘅嘴臉深得觀眾喜愛，大家都好期待佢再次出演，到咗噚日嗰集觀眾終於等到崔Auntie出現，不過焦點竟然落咗喺李嘉身上？

話說噚日嗰集講到崔Auntie為咗啱啱離婚嘅女「少欣」求姻緣，廟祝畀咗一對玉佩佢，仲話將其中一塊畀合適嘅對象，就可以撮合二人姻緣，至於崔Auntie發現潮偉（袁文傑飾）、龔燁（張景淳飾）頭髮濃密，符合佢嘅女婿條件，就諗住將玉佩畀佢哋其中一個，仲呃熊樹根話幫佢搵最佳女婿，實質係想搶女婿！

據徵婚啟事同埋崔Auntie口述，呢位「少欣」係少傑（李嘉飾）嘅孖生細妹，年輕貌美之餘仲當選過華埠小姐，大家都好好奇邊個飾演呢個角色，而到咗劇集最後終於有答案，竟然係由李嘉扮返「少欣」！

雖然李嘉身型大隻，但著起女裝戴上假髮，再加埋溫婉有禮嘅談吐，竟然別有一番韻味，唔少網民都對李嘉扮女人感到相當驚喜，仲大讚佢練武之人但雙腳卻唔粗，希望無論係「少傑」定「少欣」都可以多啲出場，大家對李嘉扮女人評價唔錯，唔知佢有冇機會成為《愛．回家》女神之一呢？

原文鏈接：http://www.orangenews.hk/officelady/system/2019/08/01/010122782.shtml