【識港網訊】無綫處境劇《愛．回家之開心速遞》上個星期嘅預告片中，播出熊家上下化身「執仇者聯盟」，大玩Marvel大熱電影《復仇者聯盟》，令人好奇究竟劇情不時暴走嘅《愛．回家》可以玩到幾癲！

到咗噚晚（1號）呢集《劇透者聯盟》終於播出，不過成集都冇Cosplay呢幕，只係講到《報仇者4》上映後，熊家人未有時間入場睇戲，唯有用盡方法避免被劇透，最後諗住終於買到戲飛，點知入場嗰刻先知買錯日期，而Peter（杜大偉飾）、Ivan（鄧永健飾）同Andy（崔錦棠飾）想再劇透畀熊家人聽，搞到佢哋個個嬲到震。

不過當熊樹根（劉丹飾）講咗句「I am Treegun」後就上片尾，正當大家都好奇Cosplay嗰幕去咗邊之際，原來嗰幕正正就係彩蛋，呢幕約1分鐘嘅彩蛋入面，見到熊家人化身「報仇者」，熊樹根扮飾鐵甲奇俠、熊若水（呂慧儀飾）就做黑寡婦、龔燁（張景淳飾）扮雷神、熊心如（蘇韻姿飾）變身Captain Marvel、金城安（周嘉洛飾）同朱凌凌（吳偉豪飾）就分別做美國隊長同鷹眼，至於熊樹仁（單立文飾）同高栢菲（湯盈盈飾）分別扮演變形俠醫同Gamora，最後更由熊樹根大講電影金句：「報仇者集結！」搞笑得嚟相當有型！

今集關於「劇透」嘅樣嘢引起唔少網民嘅共鳴，特別有感覺，不過唔少網民都反映熊家化身「報仇者聯盟」呢幕竟然係彩蛋，就唔應該擺喺預告先播出街，減低驚喜感覺，仲對呢幕唔係劇情感到失望添，不過仍大讚出嚟嘅效果好型。

原文鏈接：http://www.orangenews.hk/officelady/system/2019/07/02/010120485.shtml