【識港網訊】萬眾期待，歐陽震華（Bobby）同「群姐」喺處境劇《愛．回家之開心速遞》嘅合作，終於喺噚晚（24號）正式播出！噚晚嗰集講到群姐不時發夢夢到偶像Bobby向佢求救，令佢擔心到嘢都做唔到，甚至得罪公司大客，其後佢去咗問三世書，先知佢同Bobby有三世姻緣！

喺佢哋嘅第一世情緣入面，Bobby飾演嘅祝枝山喺妓院認識飾演花魁嘅群姐，群姐喺樓梯行落嚟嗰陣差啲仆親，Bobby即刻衝過去嚟個英雄救美，二人深情對望互生情愫，最後結成夫婦，可惜婚後生活潦倒，Bobby仲誤食咗群姐嘅老鼠藥死咗！

得知第一世害死Bobby嘅群姐覺得相當自責，仲埋怨自己冇讀好啲書，點知原來佢命剋Bobby，第二世Bobby都係畀群姐害死！第二世講到群姐係祝英台，Bobby就係梁山伯，作為書友嘅佢哋喺第一次見面中一個近距離四目交投即過電，相當搞笑！

雖然要等到今晚先知群姐會點樣又害死Bobby，但從預告中睇到群姐喺今世連累Bobby碌咗落山，究竟Bobby可唔可以平安無事呢？

劇集播出期間，喺網上隨即引起熱議，唔少網民都大讚劇情夠黐線，「波群CP」相當合襯，仲話編劇好有誠意，將以前嘅《金裝四大才子》同《情逆三世緣》融入埋一齊，更幾乎出動晒全劇演員拍攝，兼搵埋第一輯《愛．回家》嘅林漪娸客串。

同時噚晚亦係《開心速遞》全新主題曲同片頭公開嘅日子，網民都話新歌感覺好歡樂，符合返「開心速遞」嘅主題，睇嚟無論喺主題曲定噚晚劇情，大家都好滿意，唔知會唔會為劇集嘅收視創新高呢？

原文鏈接：http://www.orangenews.hk/officelady/system/2019/06/25/010119898.shtml