【識港網訊】藝人黃心穎同許志安今年4月爆出嘅「安心偷食」事件震驚全城，更一下子將佢哋嘅形象打落谷底。無綫處境劇《愛．回家之開心速遞》向來都鍾意就一啲熱話嚟抽水，冇諗過連自家藝人嘅醜聞都成為被抽水嘅對象！

噚晚播出嗰集《有食唔食？（上）》講到飾演「細龍生」嘅鄭世豪飲醉酒後，同女明星「車厘子」喺車廂入面蹺手兼錫面，點知過程畀車廂入面嘅鏡頭拍低晒，影片甚至拎咗去地下拍賣會拍賣，「大龍生」羅樂林就安排「龔燁」張景淳與「熊若水」呂慧儀去買返條片，可惜最後畀大龍生死敵「大陳」投得！

到咗今晚播出嘅下集，將會講到「細龍生」自認係「臭咗嘅男人」，仲開記者會鞠躬道歉！

唔少網民睇完之後都認為劇情影射緊「安心事件」，而「我係一個臭咗嘅男人」擺明玩緊許志安喺記者會講嘅「我係一個壞咗嘅人」，網民紛紛直呼「好正」，更加冇諗過劇組竟然連自己公司嘅人都敢抽水！

原文鏈接：http://www.orangenews.hk/officelady/system/2019/06/21/010119642.shtml