【識港網訊】

第五波疫情影響學生課堂進度，今屆中學文憑試(DSE)的安排一度成為未知數，令考生受盡情緒困擾，當局最終拍板於本周五(22日)如期開考，但考期壓縮又要做快速抗原測試應考，不少考生壓力爆煲。演藝人協會主席古天樂拍片勉勵一眾DSE考生，在疫情下「答題」並不容易，「只要盡過力，唔一定需要考第一」。

片段開始，西裝筆挺的古天樂步上學校禮堂演講台，面向一排排空櫈，歡迎一眾「新生」。「各位同學，歡迎入讀呢間『學府』。我並唔係呢度嘅校長，我同大家一樣，都係呢度嘅學生。」年輕的莘莘學子，正是人生階段之始。

他續指：「每個人一出世，都喺呢度上堂。讀嘅，只有一科。呢一科會有無數次嘅考試，而今次呢份卷，可能係歷年嚟最難答。第一條題目，就算盡咗力，都係未知點答。」

「諗住答下一題先咩？點知，係承上題。之後嘅每一題，都唔係容易。」接下來畫面出現一堆學生心中的憂慮，引起無數學生的共鳴，包括「沒有面授，如何好好吸收所學？」、「何時可跟同學見面？」、「學界比賽的夢想，要放下了吧？」、「保持距離一段日子了，還要表白嗎？」、「考期壓縮，如何分配溫習時間？」、「不幸確診，如何全力以赴？」、「不敢戶外走動，如何減壓？」、「我們如何能一起考上大學？」

「面對疫情困局，再聰明再勤力的同學，都會苦無答案。呢一科，就係人生。因為人生，就係『學苦』。」原來一開始的「學府」就是在人生路上學習面對困苦，正正是疫情下大家一起經歷的過程。

「雖然等價付出不一定換來等價交換，但你都會學識，只要盡過力，唔一定需要考第一。或者等緊我哋嘅，未必一定係最滿意嘅答案，但一定會係一個更加好嘅自己。」最後，他道出肺腑之言喻意成長，令人深思。

片末，古天樂用手寫字「加油！」向一眾DSE考生打氣，同時在社交網寫道：「一班於疫情中仍一直為學業奮鬥的學生，他們與及家長們在這幾年經歷了不一樣的學年，每天、每星期也在適應當中的變化。雖然事情仍未有最完滿的答案，但希望這條『學・苦』短片能為他們帶來一點鼓勵，尤其是即將開考的DSE，大家一起加油，撐住！」

不少學生表示「得到了力量」，網民紛紛留言：「多謝，應屆DSE考生表示一齊加油！」、「一定要上堂，當面教堂先學到嘢，而唔係網上教學，因為我們不是機械人。」、「好有heart，謝謝你為港人打氣，多謝古生！」

圖：kootinlok_louis@IG