【識港網訊】年輕嘅時候，時間好似唔值錢咁，所謂嘅「將來」同「婚姻」都好似離自己好遠，所以愛一個人，或者開始一段關係，都可以好輕鬆隨意。開始同結束都唔需要有太多嘅計算，可以跟隨自己嘅心意。

去到二十五歲開始，時間唔再係咁「便宜」，我哋開始發現時間同青春嘅可貴。同一時間，「將來」同「婚姻」好似近在咫尺。雖然無人話過三十歲一定要成家立室，但你知道你唔可能完全唔諗。而且你不其然會開始計算，你怕痴心錯付嘅錯嘅人身上，又浪費幾年青春，同時你都好擔心會耽誤咗對方嘅青春。原來不經不覺間，愛情已經唔再純粹，唔再係單純地愛就一齊，唔愛就分手，開始同結束都變成一條複雜嘅數學題。

我諗喺廿五到四十五嘅年紀，我哋對愛情都係非常小心緊謹，我哋唔再好似以前咁隨便開始一段關係，同樣，我哋都無勇氣隨便去結束一段關係。不過都因為大家自己嘅身份地位比以前高，又活多幾年更加了解自己想要啲咩，於是對另一半嘅要求都不斷提高，擇偶條件比以前更加複雜具體，因為我哋知道要搵嘅唔再係隨便試下嘅男/女朋友，而係搵緊一個希望可以共渡餘生嘅人生伴侶。

喺現實世界長大真係一啲都唔容易，不過親愛的，數學再好，我哋都無辦法準確預計到未來嘅結果，千其唔好畀呢啲無法預計嘅未知之數，阻礙自己想愛嘅心。如果喜歡一個人，不如畀自己同對方多啲信心，好似年輕時嘅自己，勇敢地去愛與被愛。

原文鏈接：http://www.orangenews.hk/officelady/system/2019/03/04/010111400.shtml