【識港網訊】《全民造星》今年嚟到第三年喇，《全民造星》係我年年都會睇嘅節目，一嚟可以睇吓靚仔，二嚟都好有話題性，當然要睇。而今年更可以畀女仔參賽，同時要係出過道嘅藝人，觀賞性又唔同咗。以下5個，係八妺姐今年嘅心水！

（一）張進翹（Manson）

Manson個樣有啲似家駒，師氣外表吸引唔少粉絲，仲要唱得彈得。而導師彭秀慧都為佢著迷，因為得唔到Manson入自己組而大崩潰，非常搞笑！Manson仲有一對電眼，真係隔住Mon都畀佢電暈呀！

（二）江宏基（Timo）

Timo係跳得之人，專長係機械舞Popping同Hiphop，佢第一回合跳《Bad Guy》順利入圍。而Timo最威係未嬴比賽已經同花姐拍廣告，可見深受廣告商歡迎！嚟緊相信佢會畀到更多驚喜觀眾，非常期待！

（三）陳毅燊（AnsonBean）

AnsonBean只有19歲，但舞功了得，佢個充滿陽光嘅笑容真係融化姐姐個心喇！佢仲係廖碧兒同水原希子個師弟，非常唔簡單。雖然佢係第一回合跌落復活區，但我相信佢一定會出到嚟繼續比賽！

（四）李靜蓮（Alina）

Alina曾經參加過《美選D.n.A》，佢好跳得而且好有壓台感。如果佢可以加強唱功，比賽一定可以行得更遠。另外，由於佢同MIRROR成員Stanley拍拖，大家可能會忽略佢嘅實力，嚟緊大家可以留意多啲佢嘅演出呀！

（五）趙祥誠（Ben）

Ben專長嘅骨折舞連ERROR肥仔都話佢係行內最優秀嘅表演者，實力超凡！不過最吸引都係佢嘅反差萌，私下嘅佢好怕羞，面試嘅時候唱歌仲會玩手指，其實有少少毒。但係佢一上台就變晒另一個人，眼神好堅定，加上舞技出眾，成個表演超精彩！

原文鏈接：https://m.orangenews.hk/details?recommendId=142945