【識港網訊】無綫兩線劇《過街英雄》、《反黑路人甲》都有喜劇元素，前者屬於演員用力演出，加上劇情對白令觀眾一笑。觀眾無需多用腦，笑咗先算。後者想以布局劇情營造張力，希望喺劇情最高峰用搞笑無厘頭化解危機，轉危為笑。觀眾要等笑位慢慢鋪墊。

成日話劇本要「情理之內，意料之外」，喜劇都要遵循呢個基本定論去營造笑位。有特異功能呢一類建構喺超現實之上嘅喜劇，都冇辦法撇低「情理」。因為任憑天馬行空都要落返地面對「人」嘅問題，觀眾先有共鳴識得笑。要設計一個喜劇框架，近日發現咗三個基本要素，同大家分享一下。

(1) 高權力但低能力角色

咁嘅設定喺喜劇裡面好常見。通常呢個高權力但低能力嘅角色身邊，都有一個或一群人附和佢，令到佢沾沾自喜，更顯得出佢嘅滑稽。呢個高權低能角色往往都有絕對大嘅權力，搞到個世界充滿荒謬，令到劇裡面矛盾處處，畀空間蘊釀爆笑劇情。

(2) 高能力但低職位角色

喜劇裡面可以有好多人看破世情，睇得出「高權低能」角色嘅真面目，但佢哋唔可以明目張膽咁講出口，因為揭破「高權低能」角色人所共見嘅謊言同謬誤，就會講出真相。有絕對真相就冇彎可以轉，笑位就會消失。呢啲會直接揭穿謊言嘅角色只會係少數，甚至一個都冇，等觀眾自己get。呢類角色嘅權力唔會大，因為佢權力大嘅話，就可以一人之力，破壞高權低能角色提供嘅笑位同荒旦劇情。主角往往就設定係(1)同(2)之間，引發笑點。

(3) 顛覆慣常定義

「顛覆慣常定義」可以展現喺角色上，又可以展現喺對白上。角色嘅職業同性格、職位同責任感、家庭或職業崗位同實際行動，好多時喺喜劇當中會被扭曲，「高權低能」角色就係一個顛覆（雖然有好多掌權人士都可以好低能），又例如警察怕黑幫、攀山專家畏高、大胃王唔鍾意食嘢等等，愈有矛盾就愈多機會發生搞笑嘅事。

至於對白上點展現呢？分兩方面，一類係有道理嘅反定義，以智慧改變你嘅固有想法，即係類似子華神嘅獨到見解「落妝之後認唔到你嘅係喬裝唔係化妝」。另一類係強權壓力下嘅不合理反定義，例如係老闆話唔減人工即係加咗人工、賽事雙方實力懸殊但教訓話係五五波可以放鬆去打。以權力壓落嚟任佢講乜都得，突顯喜劇裡面嘅荒謬。

有齊以上三個要素，都只係喜劇嘅開始，要靠台前幕後高度配合，搵到好嘅節奏，先可以做出好嘅喜劇作品。

橙新闻：https://www.orangenews.hk/tvfongeman/135400.jhtml