【識港網訊】新型肺炎持續肆虐接近八個月，專家叫大家做好心理準備，要同呢種病毒共存一段時間。多項控制疫情措施改變我哋嘅日常生活，當中限聚令同埋公共場所關閉，改變咗唔少人嘅娛樂習慣，除咗以往嘅「半主動娛樂」，即係包括喺電視機收睇電視節目之外，多咗時間喺屋企令觀眾漸漸開發更多「主動娛樂」，包括畀錢喺各大OTT平台買節目睇，或者主動喺YouTube等免費平台搵片睇，消磨時間。就我個人觀察而言，唔少觀眾對於三個範疇嘅節目質素觀感排名目前都係OTT > 電視台 > Youtube。不過喺疫情之下，後兩者嘅距離，尤其是綜藝節目方面似乎愈來愈類近。

本地YouTube影片提材廣泛

疫情爆發之前，本地YouTuber製作嘅video內容類型已經高度發展，幾乎包括晒電視台綜藝娛樂節目嘅題材。唔同嘅YouTuber專攻各種範疇，飲食、烹飪、遊戲節目都有，喺電視台製作內容近年極度重複之下，本地製作嘅YouTube videos提供咗更多選擇畀觀眾。YouTubers圍攻之下，電視台嘅出路就係用製作質素同埋人力物力去取勝，撇除需要大量人力物力嘅「大騷」唔講，當中以旅遊節目嘅分野最大，電視台相對容易搵到sponsor出埠拍攝，拍攝外遊節目有優勢。

疫情下電視台外遊節目煞停

不過喺疫情爆發之後，世界各地實施封關或者着地隔離檢疫措施，電視台出埠拍攝工作首當其衝要暫停，遊旅節目由「遊外地」變咗「遊本地」，呢個情況拉近咗電視台同YouTube內容上嘅「最大距離」，近乎正面對壘。電視台要壓住YouTube嘅話，創意同埋製作水平上都要贏過佢。不過創意同埋好橋唔係成日有，最基本、最保險就係喺製作上做好啲，節目流程、拍攝收音、剪接後製都要花多啲心力，先可以留住觀眾。

參考台灣YouTube發展

做觀眾最重要係多啲嘢揀，所以除咗電視台之外，我一樣支持YouTuber出力發展。綜藝資訊節目嚟講，本地YouTube界同電視界會唔會最後成為均勢？會點樣發展？或者我哋可以睇吓台灣，好多著名嘅YouTuber背後已經有經理人同製作團隊，有啲節目嘅scale發展到好大，同電視台節目嘅質素無乜分別，例如係《博恩夜夜秀》、《木曜4超玩》，甚至係YouTuber界頒獎典禮節目《走鐘獎》。到底香港嘅發展會好似台灣咁，電視同YouTube百花齊放，定係累鬥累令娛樂節目製作生態惡化？最終要睇製作人同埋觀眾取向：製作人做節目時會唔會慳得就慳，跌入惡性循環？觀眾會唔會以本地製作節目優先？

宏觀世界作比較

現今世代嘅娛樂唔只睇片睇電視，就算係睇亦都唔局限於一個地域嘅製作。香港本地嘅電視台又好，YouTuber、OTT平台都好，除咗要望吓自己地方嘅唔同平台發展，仲要睇吓唔同地域係發展，最好就領先同儕，如果唔係都要避免嚴重墮後，咁先有得繼續玩。

橙新闻：https://www.orangenews.hk/officelady/133974.jhtml