【識港網訊】《中佬唔易做》上星期做完，隔咗幾日終於睇晒！講真本身唔係特別有興趣，不過見播開就即管睇吓，點知比我想像中好睇同感人（係呀，居然有洋蔥位）！

艾威、敖嘉年、古明華、張松枝、袁富華同埋麥長青（麥包），六位中佬，如果唔做演員，可以做咩呢？6位中佬中有啲離開共事多年嘅大台，再加上疫情爆發，好多工都停咗。手停口停從來都係真，馬死都要落地行。雖然係真人騷，但亦係講緊而家個大環境，節目中有幾幕好深刻。

麥包負責做司機，幫人送貨，節目組安排咗陳湛文做媒考驗麥包。陳湛文上到車冇耐，就開始扮同女朋友傾電話，繼而鬧交。麥包就分享自己經歷，講到老婆當初同佢一齊時，麥包冇乜經濟能力，結婚時亦冇鑽石戒子，兩口子一直係咁捱過來，從而勉勵呢位後生仔。之後陳湛文講到自己雙失，最後唔夠錢畀麥包，麥包竟然塞返$100畀佢，叫佢留自己用。睇到呢到，我不禁諗起好多人鬧年輕一輩唔做嘢、懶、唔夠勤力，用「舊屎」（舊時）嘅標準去評定年輕人，其實有用咩？不如鬧少幾句，比啲實際建議仲好啦！

另外，張松枝做收費電視台銷售員，做媒嘅陳湛文行埋去投訴，一頭霧水嘅張松枝居然肯用自己擔個名保，話有咩事搵佢，喂，好Man呀，呢啲咪真男人囉！敖嘉年就做外賣速遞員，佢喺節目同訪問都分享過，喺送緊外賣時，因為天雨路滑，佢見到有行家炒咗車，之後好快執起返啲外賣繼續送。敖嘉年覺得非常難過，為咗生活，危險都要繼續做。

呢個年頭，生活好多唔如意，社會運動同埋疫情下嘅經濟大下跌，好多人突然失去工作，難以生活。6位中佬亦試過喺人生唔同時間遇上呢啲難關，當佢哋年紀唔細，都肯放低身段要嘗試唔同工作，只要肯做，發唔到大達，但都可以換口飯食！所以我覺得呢個節目除咗畀中年人睇，更加係比年青人睇。

橙新聞：http://www.orangenews.hk/officelady/system/2020/06/24/010153244.shtml