【識港網訊】由王祖藍擔任主持的綜藝節目 《有個閨密叫祖藍》 將於本周六播出最後一集，嘉賓請來終極 Big Boss 李亞男。華姐出身的李亞男 Leanne 、 平時予人感覺高貴大方，但當面對祖藍卻變成另一個人。

兩人在「玩命」版「閨密快問快答」，默契驚人，二人均九秒九答出「第一次見面地方」、「第一次見面年份」、「第一次約會地點」的答案及細節。Leanne還首度展現了聲演恐龍，祖藍事後解釋指相關絕技由他親自教授，主要是平時用來氹兩個囡囡開心，足見母愛偉大，難怪祖藍亦一再大讚Leanne是願意無條件付出的好媽媽。

李亞男自揭係「閨密任務」幕後黑手

呢啲表情應該好難喺其他華姐或港姐身上睇到。

二人今次應製作組「安排」，玩盡以往八集所有「閨密任務」，Leanne自揭是所有閨密任務幕後黑手，並大爆做Big Boss背後真正目的！玩任務期間「藍男」互爆對方黑材料，祖藍指Leanne缺點是「太過華姐」：「佢喺屋企入面都好華姐架，佢唔會發嬲啦，你其實基本上見唔到佢唔笑架，佢唔明你講咩又好，佢嬲你又好，佢都係保持住華姐笑容。同埋佢永遠唔會太興奮，佢甚至乎喺屋企啱啱沖完涼，包住咗個頭，同我講嘢都會有華姐腔。」Leanne則投訴祖藍「惡意」放屁：「佢成日喺個被竇入面屙屁，佢明明可以講句唔好意思、然後出一出去架嘛……重點係我仲喺（被）入面，你要焗死自己，OK！It’s alright, but you know……」之後再狂數祖藍烏搲事件簿，內容爆笑。

唔知係咪同祖藍一齊耐咗嘅關係，Leanne變得搞笑咗好多。

對於祖藍不斷喺《閨密》入面同唔同嘅閨密有不同程度嘅身體接觸，之前同祖藍約法三章不能有身體接觸嘅Leanne，向老公大興問罪之師。

為咗「贖罪」，祖藍要「公主抱」李亞男。

已婚七年的「藍男」，雖然經常孖公仔姿態接Job及出席大小場口，但在節目中還是按捺不住大耍花槍，尤以Leanne較為進擊，二人玩Truth or Dare時，Leanne乘機向老公索吻，並撒嬌謂：「畀個機會我！（王：好耐冇嘴過咩？）係喔，24小時前（錫錫）喇。」不過當祖藍真的準備獻吻，Leanne又忽然少女上身大叫「好尷尬」，幾經扭擰二人最終甜蜜咀嘴。之後Leanne又藉「秋後算帳」要求老公公主抱：「我搞咁多嘢就係為咗你要抱我咯！」由於Leanne太高大，即使祖藍出盡吃奶之力，還是抱得相當不穩；此時Leanne再下一城要求老公抱著她跳舞，祖藍聞言嚇至眼凸：「你真係決定咁做？我條腰要睇醫生架喇喎。」互動爆笑又甜蜜。

圖：TVB