【識港網訊】草蜢相隔五年再踏紅館，於今年10月26日起舉行一連四場「RE: GRASSHOPPER CONCERT 草蜢演唱會2022」，門票明天（8日）公開發售。過往他們的演唱會海報都是三個大頭相，但今次設計總監朱祖兒則採用剪影般的影像，打破傳統。

草蜢與朱祖兒合作無間，多年來演唱會海報都由他操刀，今次亦不例外，這大膽設計源於「草蜢」這兩個字。蔡一智說：「朱祖兒話一提到『草蜢』，個腦就會Recall好多舞台表演、跳舞、唱歌嘅畫面，唔使真係見到我哋個樣，所以今次用呢個手法就係保留思考空間。」蘇志威笑說：「今次要摒棄我個靚仔樣⋯⋯」蔡一傑強調：「其實細心留意係見到少少，只係唔係咁清楚啫！」阿智續說：「好有神秘感，見到少少，好似新娘嘅頭紗，到開騷嗰日就會揭開畀大家驚喜。」

阿智表示今次海報重點是草蜢的神髓，雖然近乎剪影的頭像，但仍可以清楚分得出他們。他又說：「唔少Fans反映話今次張海報好特別，所以我哋諗住演唱會期間，搞個PopUp Store，除咗設計不同紀念品，仲會整大型紙牌海報畀Fans影相留念，希望帶畀大家快樂嘅回憶。」

這幾年沒有開騷，草蜢笑言轉行做運動員，不時在IG公開跑步和健身的生活片。阿智笑說：「呢幾年我哋無出國，更加無去韓國，Fit咗靚仔咗都係因為運動多咗，準備咗咁耐終於可以上紅館騷畀大家睇，草蜢2.0版！」會否台上騷肌？他們笑笑要賣關子。