【識港網訊】

現年32歲的余德丞（Dickson）早前憑TVB劇集《青春不要臉》人氣急升，本來屬TVB上位男神，但5月1日Dickson卻突然在YouTube宣佈已離巢，與TVB結束8年賓主關係，雖然在片中，Dickson未有交代離巢原因及去向，但就自爆一直未有澄清點燈續命傳聞，是受舊東家無綫指示，更指事件令他耿耿於懷。

余德丞（Dickson）離巢後，先到商台擔任《口水多過浪花》的客席主持，拍住Do姐、余迪偉和傑朱做節目，昨日(2號)Dickson將第一日工作拍下做記錄，當日早上10點半Dickson便起身刷牙洗面，然後食早餐後便揸車出發到商台做主持。

錄影完，Dickson坦言好緊張，他說：「平時我就真係口水多過浪花，但今日去到《口水多過浪花》就真係一滴口水都冇，好緊張又驚講錯嘢。所以…做節目同平時做人吹水係唔同。」雖然第一次表現麻麻，不過Dickson發誓指下周一再開咪，一定做得更好。

Diskson談到為何會做DJ，原來他於2011年大學畢業後，曾經申請過做商台PA（節目編導），但當時因犯下一個錯誤令他失去面試機會，他說：「我係串錯咗人哋個姓，Mr.KWOK，我串錯KOWK，難怪會冇回音。好好彩，多謝商台，多謝Do姐，隔咗11年後畀多次機會我，喺大氣電波開咪，我會繼續努力」隨後，Diskson亦有在IG留言：「十年前想做嘅一件事實現了！」

圖：yuduck@IG