「姜濤誕」4月30日是人氣男團MIRROR成員姜濤(姜B)的23歲生日，工作繁重的他在拍攝中度過今年生日，正日就繼續為ViuTV拍新劇《季前賽》，當晚收工後神秘現身銅鑼灣慰勞粉絲，翌日五一勞動節又早起全日拍廣告，相當勤力！

姜糖耗資七位數字籌備生日應援

姜濤一眾粉絲(姜糖)早於一個月前已開始籌備為偶像賀壽，耗資七位數字，包括在買下銅鑼灣多個當眼位置的廣告位、在商場設置大型打卡點，以及請全港市民坐電車，再次把銅鑼灣變成「姜濤灣」！銅鑼灣整個周末都人頭湧湧，每當「姜濤號」電車駛經時，現場過千名姜糖企滿行人路迎接，大叫「姜濤生日快樂」，群情洶湧。

姜濤的居所位於銅鑼灣，粉絲們希望偶像出入都能看到生日祝賀，故幾年來「姜濤誕」銅鑼灣都會化為「姜濤灣」。今年姜濤媽媽下午外出時就被姜糖「野生捕獲」，被重重包圍拍照，更有粉絲大叫「奶奶」，自認成為姜濤太太。

姜濤生日願望：疫情快啲過

在拍劇中度過生日的姜B，亦特意拍片多謝粉絲，道出他今年的生日願望：「好多謝大家一直以嚟、我入行以嚟對我生日嘅應援，尤其是今次見到大家好用心準備我嘅23歲生日，所以都發自內心好多謝大家。其實我嘅生日願望，好簡單，我諗好多人都一樣，應該都係希望疫情快啲過，希望每個人可以快啲回復返正常嘅生活。但喺疫情期間，希望大家都要充滿愛，大家都可以互相幫助，一齊渡過呢段艱難嘅時候，咁我哋就可以快啲去旅行。所以都再次都希望所有人都身體健康，希望支持我嘅fans姜糖們，你哋都可以永遠幸福。」

姜濤於生日當天推出新歌《作品的說話》，自導自演MV，以他的願望「世界和平」為主題傳遞反戰訊息。新歌MV上載三天已超過200萬播放率。

快閃銅鑼灣3分鐘為粉絲送驚喜

30日晚上，姜濤完成當日劇集拍攝工作後，快閃突襲銅鑼灣！身穿全黑衛衣的他戴帽子包到冚，但一到場仍被粉絲立刻認出，姜糖瘋狂失控尖叫，一擁而上將偶像包圍，姜濤則一邊揮手一邊叫粉絲小心。他逗留約3分鐘後登上保姆車離開。

翌日早上，姜濤隨即開工拍攝飲品廣告，由朝拍到晚。雖然略帶倦容，停機時攰到不停「放蚊」，但一埋位就表現精神，相當專業！而廣告商亦有預備巨型生日蛋糕為他慶生，姜濤就識做地上載蛋糕照於社交平台答謝客戶。

圖：keung_show@IG、星島日報、ViuTV