【識港網訊】

NFT熱潮席捲全球，「搖滾教父」黃貫中（Paul）也跟上潮流，於本月初發行了首個NFT音樂作品《彗星》。近日Paul為《黄貫中歌曲翻唱大賽》擔任線上評審，除了鼓勵參賽者盡情享受舞台，還預告有望於年內推出全新實體專輯，用音樂回饋「中粉」。

從傳統歌壇踩入NFT市場，Paul認為元宇宙的創作環境廣闊多元，有助音樂人建構更多可能性：「做音樂做咗幾十年，突然面對一個新媒體，我哋都會緊張，一開始都會有啲擔心，唔知大家接唔接受；不過NFT音樂係一種全新面貌，見到一個全新嘅音樂展現，我覺得好興奮！」為了這支NFT音樂作品，他更親筆繪畫了近六十幅畫作：「我由出世到依家一直都有養狗，所以好鍾意畫狗，今次就順理成章做埋NFT。其實我準備咗五、六十幅畀佢哋揀，多到佢哋叫我唔好再畫，所以最後揀咗四幅。」

今次推出的音樂NFT《彗星》限量發行2000枚，Paul笑言不捨得「女兒出嫁」，又稱：「我好鍾意其中幾個版本，同事都叫我自己買返，我真係有諗過買㗎！不過後來又諗，出歌都係想畀大家聽到，無理由仲要同歌迷爭，我老婆（朱茵）都鬧我：『你唔好啦，搶人哋啲嘢！』」

回溯Paul上一隻個人專輯，已經是2003年發行的精選專輯，不過近日他宣佈好消息，今年有望出新碟，他說：「新碟對我嚟講係一張成績表、係我呢一生人做音樂嘅成績表，我由八幾年開始出唱片，就快四十年喇，我都希望自己有一個里程碑。有啲人會話：『你做咗幾十年仲出唱片？』因為呢個年頭出唱片真係一個好勇敢嘅行為，但係我認為我唔可以唔出，因為我係一個音樂人，希望呢隻唱片對自己有個交代。他日真係老到結他都彈唔到，我就會叫大家：『聽呢隻啦！』希望新專輯可以扮演呢個角色。」