【識港網訊】本身鍾意睇離奇怪誕類型嘅劇集，一般情情愛愛嘅片我其實嘛嘛哋。不過最近唔少朋友睇《假設性無罪》睇到入晒迷，我就試吓睇啦咁，結果又真係捱眼瞓都想睇埋落去。

套劇噚晚結局咗，但因為我太遲開始睇，所以只係睇到一大半。當中最令我入迷除咗好似查案咁搵出「真兇」外，最令我有感受嘅係YK、Shirley同埋Sum Sum嘅三角關係，睇到我好為Sum Sum心痛。

雖然好朋友搭上自己老公呢啲情節真係喺劇集常常發生，但我覺得Sum Sum同Shirley呢兩位演員真係做得好好，飾演YK老婆Sum Sum嘅董敏莉，完全演繹到被最愛出賣嘅無奈、心如刀割同埋迷茫。佢一直做好老婆、好媽媽嘅角色，明知老公出面有女人依然啞忍，希望維護整個家庭，不過最估唔到嘅係第三者係自己多年嘅好友Shirley。

飾演律師兼Sum Sum好友Shirley嘅羅沛琪（Pinky）演繹到女強人嘅強悍同機智，Shirley成日同YK傾心事，為YK解憂，甚至希望Sum Sum同YK真係可以好好行落去。作為觀眾，我覺得佢真係想Sum Sum同YK幸福，奈何情感控制唔到，Shirley一方面安慰人哋老公，但佢又唔同自己老公好好溝通，呢個唔係好多情侶嘅寫照嗎？

其中有一幕我睇到好心寒，就係Sum Sum一直知道原來第三者係YK電話入面嘅「John」，當時Sum Sum同YK鬧交，Sum Sum拎起YK電話打畀「John」搵出第三者，結果當時喺佢哋屋企嘅Shirley電話響起，來電顯示係「Karen」。呢個特登將第三者或曖昧對象電話入返同性名字嘅方法，身邊唔少出過軌嘅朋友都試過咁做。

有時我寧願輕輕鬆鬆睇喜劇，係因為就算劇情好癲好離地，我都係可以笑吓就算，唔使諗太多。但呢個劇令我反思同心寒嘅位，正正係因為太寫實，寫實到令人心痛同心寒，就好似呢啲事係你身邊隨時發生緊咁。

原文鏈接：http://www.orangenews.hk/officelady/system/2019/10/24/010129735.shtml