【識港網訊】藝人方力申（小方）喺嚟緊11月將會為慈善挑戰45公里環島游，到時仲要游成12個鐘，所以小方都唔敢鬆懈，連日嚟積極備戰，一個禮拜練足6日水，不過呢項挑戰始終都有相當大嘅難度，小方練水嘅時候都真係辛苦到嘔！

小方今日（9號）喺社交網晒出兩條影片，第一條見到佢喺海中心，透露自己仲有差唔多兩公里就游到淺水灣，而佢喺兩公里前隊友講Bye Bye自己游，佢解釋雖然係唔畀自己一個游，但因為佢頭痛，喺個海等待嘅話會畀海浪搞到更頭暈，仲會曬到面都痛，所以佢寧願慢慢游，更坦言再等佢會唔掂會嘔：「其實我而家都可以嘔喎我估……」

點知話口未完，喺第二條片就見到小方用手指扣一扣喉，就噴射式咁連嘔4次，真係睇見都覺得辛苦，佢更留言表示：「#游海真係唔簡單 #容易脫水容易中暑容易嘔 #點解我要咁辛苦 #同情我請捐款」不少網民都留言為小方打氣，更希望佢小心身體同埋注意安全，唔好畀咁大壓力自己。

原文鏈接：http://www.orangenews.hk/officelady/system/2019/09/09/010125913.shtml