【識港網訊】ViuTV全新處境喜劇《娛樂風雲》星期一至五晚上8時正播放，ERROR成員何啟華（Dee） 、郭嘉駿（193）及MIRROR成員李駿傑（Jeremy）日前拍攝表示，三人自參與《全民造星》認識，默契十足，而且故事又承接《做演藝嘅》，所以一埋位就已能投入角色。193及Jeremy老友鬼鬼，即使Jeremy經常被193言語攻擊都沒有詐型。

193表示：「拍處境劇需要用好多時間，經理人花姐都開始有微言，因為我哋除咗拍劇，仲有《花姐ERROR遊2》未拍晒，經理人度期度到爆炸！你估我哋好似Jeremy咁咩，我哋組合得四個人，唔見一個就好大鑊，MIRROR有12個人，佢唔見咗都未必覺！」Jeremy就想和ERROR成員合作：「我哋透過拍劇同ERROR合作，雖然我一直話做唱跳歌手，不過唔抗拒拍劇，貪心少少想雙線發展。」

Dee亦表示自己喜歡拍劇，希望公司添食，長拍長有：「而家真係經歷緊一個藝人生活，公司對我地好好，畀好多工作我哋做，而家平衡緊個心態，面對一連串工作，沒有最忙，只有更忙！」

193及Jeremy表示與劉錫賢合作感壓力，193更大爆Jeremy扮勤力：「我見Jeremy份劇本用螢光筆間晒對白，我以為佢做晒功課好勤力啦，搞到我都有壓力學佢咁準備，點知一埋位佢都係甩對白，原來只係扮勤力。好在團隊好好，NG都唔會鬧我哋。而賢哥亦好大方，見我地新人NG冇所謂，笑笑口再拍過。」

193又爆料於深水埗舊樓拍攝時，劉錫賢介紹該區「特色架步」：「我哋發現呢度好多單位都貼晒反光膠紙，我哋就問賢哥，佢話自己細個時有研究。」劉錫賢則否認：「唔係呀，千萬唔好心邪！來到深水埗呢度太多美食，我一半身材來自呢一區，之不過見慣見熟先知咩架步。」

原文鏈接：http://www.orangenews.hk/officelady/system/2019/07/25/010122267.shtml