【識港網訊】已故香港天后梅艷芳離世後留下近億遺產，雖然梅姐成立了信託基金管理遺產，但梅媽覃美金和哥哥梅啟明對信託內容大感不滿，以往常常「並肩作戰」打官司爭產，但早前梅媽因受不了梅啟明經常索錢決定登報脫離母子關係。但最近梅啟明入稟高等法院，指梅媽遭姪兒及看護「鄭姑娘」軟禁，向二人索償合共800萬元。梅媽接受傳媒訪問時否認遭禁錮，更鬧爆梅啟明索錢永無寧日，並爆料指梅啟明在美國有兩個私生子！

梅啟明入稟高等法院，指控姪兒梅柏麟濫用梅媽每月25萬元的生活費，又指控看護「鄭姑娘」軟禁梅媽，令她失去自由，並迫梅媽登報與他脫離母子關係，索償合共800萬元。昨天（30日），梅媽覃美金接受網台節目《D100娛限奶媽》主持潘小文訪問，開腔否認被禁錮：「我好清醒有食嘢，鄭姑娘好到搵唔番第二個。我點會被禁錮，冇咁嘅事，佢（梅啟明）想我禁錮就真，所以避佢搬到咁遠。佢樣樣都錢錢錢，一個月畀一萬、二萬、三萬，固定咗我可以做得到，我都會做，但你唔係喎！攞錢冇固定時間，你叫我點頂呀，我都係靠阿梅嗰度生活費，又要交租都兩三萬蚊租。」

梅媽提到梅啟明時相當勞氣，形容他是4個仔女中最衰，更指梅啟明四處留種︰「幾十歲仲去搵女人搞搞震，（我）啲錢好辛苦㗎，阿梅啲錢（遺產）係用嚟做生活費㗎，唔係畀你拎出去玩女人㗎！你有錢去玩你嘅事，我每使一毫子都係阿梅嘅辛苦錢。佢有錢包10個都唔關我事，我講明，玩女人我一毫子都唔會畀錢你。佢喺美國又有『蘇州屎』，仲有兩個仔！真陰功囉……佢風流，咩唔風流呀。」