【識港網訊】Mirror成員邱傲然（Tiger）日前擔任第16屆鮮浪潮國際短片節本地競賽頒獎典禮的頒獎嘉賓。頒獎前，Tiger的一番致辭妙趣橫生，引起回響。

Tiger作致辭時，談起Mirror被分成上下弦的現況：「近排就好多人搵MIRROR拍戲，梗係好啦，搵Mirror拍戲。咁但係佢哋好多時都係搵姜濤、Edan、Anson Lo、AK，搵阿Jer或者都有搵下Lokman，但大多數都係搵上弦個啲人。咁咩係上弦呢？其實就係MIRROR十二個人，多啲人識嗰6個就係叫上弦，無咩人識嗰啲就係下弦，咁佢哋其實好少搵下弦嘅人拍戲嘅。」

隨後就是幽默自嘲的自我介紹：「有見及此，我今日係嚟尋找工作機會嘅。大家好，我係下弦嘅Tiger！」成功引來現場陣陣的掌聲及歡呼聲。

Tiger接着解釋為何他們會被稱為下弦：「可能佢哋會覺得呢班人唔得啦，覺得呢班人冇作品點會得呢？」，他說：「冇作品畀你睇到，即係冇睇到啦，咁冇睇到你又點解知我哋唔得呢？」，又舉例：「我好多同齡朋友，佢啱啱出嚟社會做嘢，廿二歲。啲老闆聽到咁後生、咁年輕得唔得㗎？」，面對被嫌「唔得」，Tiger坦言唯有盡力試。

Tiger又指他在兩日才收到通知被邀請出席頒獎典禮。他大感驚訝，他說：「我喎？講嘢喎？For大家info，我係sell唔講嘢嘅。」Tiger表示入行學到一樣好重要的事，就是「無機會嘅時候就努力啲、有機會嘅時候就盡力啲。」他繼續說：「咁既然今日有機會，咁我就要盡力啲啦」他趁機宣傳有份參演ViuTV的新劇《死角》，寄語大家看完作品再決定他們「得唔得」。

圖：TIGER YNY FC Channel@YouTube、tiger_yny@Instagram