【識港網訊】MIRROR成員盧瀚霆（Anson Lo）昨日（6月8日）推出了獨唱新歌《King Kong》，更首次擔任此曲MV的導演。「教主」在MV內的貼身背心造型Man爆，大騷麒麟臂，獲「神徒」大讚。推出不足一天，已經有近80萬觀看次數！不過他坦言有不足，曾為拍攝感到壓力快要爆煲。

談MV傳遞之訊息

Anson Lo希望能借新歌MV向《移動迷宮》系列電影致敬，因此MV都參考了電影畫面的風格去拍攝。而劇情編排上，則希望帶出良性競爭的道理。

「成個故事配合返歌詞內容，比喻人為求要得到想擁有嘅嘢而競爭、比賽，但其實好多時同自己比較或者贏自己之餘，好大機會可以一齊贏，大家一齊擁有一個好好嘅成果，可以分享。」

談最邋遢造型

Anson Lo一向愛美而且愛乾淨，但是這個MV之中卻看到不少沙塵滾滾、滿身骯髒和傷痕的場面，他更不惜躺在地上？

「今次MV造型係自己史上最污糟邋遢、最不修邊幅，對我Standard嚟講係好大膽挑戰，因為我通常著長袖，得兩件Layer算少，而且一定長袖、西裝居多，希望今次MV會令大家覺得同以往嘅Anson Lo嘅跳唱造型有啲唔同。」

談第一次當導演

而對於今次「第一次」體驗，Anson Lo形容是「很驚慌」。因為除了要集中自己的演繹以外，更要顧及各種幕後創作和製作，如故事情節、拍攝流程、其他演員情緒演出等，帶給他無比壓力！

「冇諗過自己要參與嘅部份有咁多。以往自己Expect（預期）做導演可能只係諗MV橋段，大家著乜嘢衫，好片面嘅設計概念，但今次執導《King Kong》之後，就發現好多嘢都要顧及。」

「如果話自己係呢個MV嘅導演嘅時候，就好似MV 100%好與壞都完全自己造成，所以由Day 1開始都好想確保MV質素係好，或者表達故事同歌《King Kong》本身首歌詞係同步，呢個係最大壓力來源。」

談拍攝辛酸

今次拍攝時間長達40小時，需要分開兩日拍攝，足以打破Anson Lo過去的獨唱MV紀錄。

「以往拍攝Solo MV最多只需二十多個小時，所以今次係拍攝時間最長嘅一次，亦係最攰嘅一次！因為開拍之前拍緊劇，跟住連續拍兩日MV，中間出席咗一個工作event，拍完Day 2後就要立即去拍劇，拍劇後又要再做第二樣工作，結果咁多日只係瞓咗3小時，所以休息時間亦係最少嘅一次，係一個破紀錄嘅MV。」

圖：《King Kong》、ansonlht@Instagram、anson_theak47@Instagram、rockinair@Instagram