【識港網訊】TVB綜藝節目《360秒人生課堂》，由主持林盛斌（Bob）請來不同界別及各有經歷的嘉賓，以360秒的演講娓娓道出他/她的人生故事，節目轉眼來到最後兩集。最後兩集內容將延長至45分鐘，演講嘉賓先後有以棟篤笑角度講述歧視問題的印度裔香港人阿V、曾因陷全身癱瘓難關、一度有意尋死的嚴楚碧Rabi、面對「淪落」指控的Sales陳迪豪Tony、及感激亡母無私付出及照顧的魯振順。

主持Bob亦會以壓軸演講嘉賓身份，講述入行初期如何遭受冷眼，以及感激嘲諷過他的人成就今時今日強大的自己。Bob：「記得當年喺電台冇節目做，突然有一日有機會畀我錄電台廣告，平時錄廣告嗰位DJ係啤梨（葉文輝），嗰日佢唔舒服，但個廣告又趕住出街，監製一見到我行過就話：『你啦！』就係咁，我錄咗我人生第一次電台廣告，我好開心，好畀心機。個客聽完第一句就問：『呢把聲邊個嚟？阿Bob？乜水嚟架？你唔好搵啲阿豬阿狗去錄我啲廣告吖。得得得，個廣告唔出街住，你等啤梨好番先再錄啦。」

魯振順則對已離世的母親、一直默默支持其追尋演員夢表達謝意：「阿爸唔贊成我參加訓練班，但阿媽冇理佢，佢只係叫我畀心機做好自己、爭番啖氣。嗰時實習要做甲乙丙丁、行行企企，根本冇得瞓冇得休息；咁一有得瞓就梗係死命咁瞓、乜都唔食啦，但我阿媽就坐喺床邊，用個匙羮將啲食物塞落我個嘴度話要食嘢，佢話：『唔食嘢冇營養會死架』。」

圖：TVB