【識港網訊】藝人金燕玲最近跟隨密友蘇施黃，開設個人影片頻道，昨日（3號）上載首支影片，誰知她在第一條影片已放震撼彈，自揭繼2019年3月患上子宮癌後，於今個農曆年證實患上一期乳癌！

金燕玲在片中透露過了一個特別的新年，因為她與兩年前一樣，在新年前發現自己患上癌症：「今次係我做拉筋嗰陣，我突然摸到自己左胸有一粒嘢，結果我諗咗一晚之後，第二日就即刻去搵醫生問我應該點做，佢就叫我即刻去檢查，檢查完咗之後，點知我要捱到年初五先證實自己有Cancer。」

金燕玲坦言今次分享的原因，是希望大家由她口中得知這件事，她又指上次患癌時呼籲大家要做身體檢查和買保險，不過今次並非透過身體檢查發現，而是自己摸到，她認為：「唔知係上天定神保佑我，無端端畀我自己去摸，竟然摸到呢粒嘢而發現。」

至於金燕玲表示目前已做手術，癌症屬於一期B，無需要切除胸部，但電療一定要做，所以就算患癌，但已是幸運中最幸運的情況。她坦言今次經過令她很驚慌，更一度哽咽兼強忍淚水：「首先我唔係難受，但係呢個經歷真係幾驚，點解呢？原因係個胸對女人嚟講係真係幾緊要，見醫生嘅時候，雖然佢覺得係樂觀，因為粒嘢唔係好大，而且睇片又幾清，但係佢都會解釋畀你聽，開完刀都拎去做化驗，萬一原來已經走咗去其他地方，呢樣嘢要一路做一路驗。淋巴嗰度開刀之前要追蹤，追蹤之後就發現有兩粒前哨淋巴。」幸好她切除腫瘤和那兩粒淋巴後，現在沒有擴散：「我入咗醫院兩晚，開咗刀第二日就出院，噚晚返去休息，今日已經出制，你話係咪癲嘅啫！」

金燕玲希望透過自己的故事呼籲大家「得閒無事就去摸吓自己」：「平時我唔會走去摸，我都唔知道如果生嘢嗰粒嘢係咩樣，但我今次經驗話畀大家知，雖然我唔知道有問題係點樣，但因為平日粒嘢係唔喺到，當我一摸佢原來佢『銀』住，唔知點解嗰日個胸好脹，所以嗰粒嘢就好明顯，當我再去化驗去摸嘅時候，喺無咁脹嗰陣原來粒嘢唔係好摸到，結果就係一定要摸，摸到有粒嘢就真係立即搵醫生。」

金燕玲又表示：「可能有啲會覺得『哎吔有冇搞錯呀又生Cancer』，係呀，咩都要打孖嚟，流感嘅時候有兩個流感，兩年後又有第二個Cancer，但係我覺得自己係一個好幸福同好幸運嘅人，兩個Cancer都係不幸中嘅大幸。」

至於蘇施黃今日（4號）於社交網上載與金燕玲的合照，並留言：「昨晚金小姐的新Youtube channel『金燕玲 隨心。隨興 』一出，有很多朋友及粉絲的慰問。金小姐叫我代感謝大家。佢真係好犀利的，做完手術第二日已出院，第三天已出街，佢話唔好當自己有病匿埋喺屋企喎。我做司機蘇，駕車也小心翼翼，費事揼親佢。這幅相是手術後拍攝的，衷心多謝大家關心。」

原文鏈接：https://m.orangenews.hk/details?recommendId=152418