【識港網訊】楊千嬅最近除了忙於參與內地綜藝節目《聲生不息》，為了紀念入行25年，她籌備多時的紀錄片亦正式上架。

今次的紀錄片中，千嬅分享由護士轉行做歌手，及結婚生仔的經歷，稱「好多感受同回憶，至今我仍慶幸我喺華星出世，畀我一個好紮實做藝人嘅基礎，除咗唱歌，仲有演戲、做主持等等，令我有好多可能性。而家回頭睇當然覺得唔容易，不過唔止我，相信每個人一路走來都唔容易。」

近年楊千嬅面對唔少負評，如被封「楊千蟬」、「樂壇人瑞」等，她亦樂觀面對，表示：「年紀大唔係一個負評，係一個事實，咁我真係會老嘛！唔會唔開心，係正常人生過程。所有嘢都係人生經歷，重要係我目標好清晰，最緊要健康身體，我要照顧父母、陪伴小朋友成長，中間有時間唱歌、追求夢想去令自己快樂……追夢係生存養分，有呢幾樣生存基礎已經好幸福。」

紀錄片尾聲千嬅眼紅紅表示：「當初嘅平凡我真係唔理解，唔知自己叫平凡，所以第一次拎叱咤時，我真係唔係特別生得靚，無幾千萬堆頭，淨係心口有個勇字係真架﹗因為我只係相信，只係「爭氣」兩個字就逼自己，死都要練好佢。甚至走到今日，望見當初嘅不確定同無自信，原來係人地最欣賞我嘅地方。」

圖：芒果TV