姜濤年僅19歲便成為《全民造星》冠軍，出道短短三年已經成為人氣王，所到之處都吸引大量姜糖應援，爆紅後的姜濤沒有因此而心高氣傲，日前他到Do姐（鄭裕玲）主持的電台節目《口水多過浪花》做嘉賓，稱「有自知之明唔係咩天才」，要時刻提醒自己不能夠自滿，就連Do姐都大讚姜濤成熟。

昨日（17日），Do姐（鄭裕玲）主持的電台節目《口水多過浪花》有姜濤做嘉賓，姜濤剖白成名後的內心，更透露心中的遺憾。眾所周知，姜濤曾是重達200磅的肥仔，他稱以往性格有缺憾，「我係一個好肥嘅人，但內心深處唔肯承認自己咁肥，當呢種矛盾狀態一齊時，就會變成乞人憎，可能大家話我肥，我會話：『肥乜吖！』我都會攻擊番人哋，可能一句玩笑說話，我好認真，呢啲可能導致到外界人愈來愈唔鍾意我，我都唔想鍾意佢哋，呢種幼稚心態，導致自己嗰時冇乜到朋友。」他稱「其實諗番自己性格都好有問題，如果唔係自己性格，都唔會受到咁樣對待。」

姜濤亦重提中三輟學的經歷，他初中時原本就讀鄧肇堅維多利亞官立中學，但到中三轉學去青年學院（邱子文）讀文憑，姜濤稱「因為我細個讀書唔叻，我喺學校好曳，要見社工。所以就離開咗，而離開後幾後悔，後悔冇珍惜學生時光。」

如果可以重回學生時期，姜濤稱：「希望成熟啲、希望學生時代都靚仔，內心深處唔甘於做肥仔。」他憑自身經驗鼓勵粉絲要學懂與自己溝通：「問吓自己想成為乜嘢人，最可以推動自己只有自己，多啲同自己溝通，誠實面對自己諗法，係咪甘於成為咁樣嘅人，希望多啲同自己溝通，所以最終解決都係自己。」

原文鏈接：

https://m.orangenews.hk/details?recommendId=1135383