無綫台慶劇《星空下的仁醫》下周一（22日）播出大結局，劇情進入結局篇愈見緊湊，前晚鍾嘉欣演的章以芯因感染病毒以致胎兒難產嚎啕大哭，鄭嘉穎演醫生在努力挽救胎兒失敗後灑下哀痛淚珠。他為了不使嘉欣自責，攬上身指是自己失誤害死BB，兩人該場精湛演技引爆觀眾淚彈，網民力推他們是今屆最佳男主角（視帝）、最佳女主角（視后）人選，已是「視帝」級的嘉穎大方「讓賽」，推選未曾得過該獎的演員攞獎，點名大讚譚俊彥和張振朗演技好好，嘉欣則很多謝網民支持，自言做了媽媽後對演喊戲大有幫助。

嘉穎、周家怡、羅子溢、陳自瑤、張寶兒等《星空下的仁醫》一眾演員昨日到紅磡某商場進行宣傳活動，嘉穎到場後見到劇中小演員時，即親切地上前打招呼，一班小朋友亦顯得雀躍，相當投契，活動上嘉穎更被選為其中一位「最受小朋友歡迎角色獎」。對於演技備受讚賞，嘉穎很多謝觀眾支持，謙稱只是做好演員本分，說到前晚他和嘉欣在手術室搶救BB一幕，道具BB的像真度極高，嘉穎謂：「我當真BB來演，真的要誇獎一下道具組，好少可以拍close up。」據知該道具BB造價達5位數，嘉穎認為是物超所值。

說到這場催淚戲，嘉穎表示：「通常喊戲永遠是第一Take最好，我同導演講第2 Take都OK，去到第3 Take就真係『做』喇，我第一Take嘅眼淚同感覺最真，所以要求近鏡去拍。」他和嘉欣在劇中鬥戲擦出不少火花，產生出化學作用，嘉穎稱：「大家做了職業演員好多年，嘉欣都話拍過數十部劇集，我入行比她早，一定更多，對新人來講大家都是前輩，慶幸遇到嘉欣這位有經驗的對手。」

嘉穎吸引家長級粉絲

嘉穎這次演出令奪視帝「加分」，他謂：「不好這樣說，我個人希望未曾攞過這個獎的人得到，可能會改變他們一生，好似Shaun（譚俊彥）演得好好，仲有《拳王》的張振朗，見他操肌操得好辛苦都值得攞獎，總之大家喜歡套劇和我的演出已經好開心。」嘉穎和現場的小演員打成一片，甚受小朋友歡迎，問他是否多了小朋友粉絲，他笑說：「我最受小朋友歡迎是屋企兩個仔，反而覺得多了家長級粉絲，好似覺得我識醫病，其實有病要睇醫生，但不是搵我，哈！哈！（會否開續集？）這要問監製，都要好多因素配合，最希望是盡快通關。」

嘉欣對於網民一致好評，她越洋受訪時大表感謝，並透露入行以來每個角色，都有盡力去設計及演繹：「細個時演較年輕嘅角色，喊嘅時候會簡單啲；但章以芯資歷相對較多，我自己又進入另一階段做了媽咪，所以處理喊戲時會有不同，因為要顧及嘅嘢多咗，會好自然地變更深層次。」嘉欣又謂這場重要喊戲均是由心而發、順其自然：「我只係投入咗個角色，畀自己嘅身體語言同思維自然流露出嚟，再隨住劇本嘅帶領以及當日嘅狀態，盡我全力去做好佢。」嘉欣又坦言做了媽咪後對演喊戲有幫助：「學套劇話齋，媽咪係有一種本能，我嘅本能就係更加connect到我自己嘅內心世界同情緒，即係痛可以更痛。」

談到網民指嘉欣乃是屆視后不二之選，嘉欣直言很感動：「再次多謝大家支持，真係對我好大鼓勵，我都有成五、六年冇乜演過戲，大家都仲記得同支持我，我非常感動。我對自己演出係有信心嘅，畢竟我演咗戲十幾年，未結婚之前我都拍咗成四十部劇，有好多訓練同進步嘅機會。章以芯我係好期待去演嘅，我亦好感恩呢個角色畀咗我好多學習機會，無論演戲抑或處事，我都好多謝呢個角色。」