【識港網訊】八足咁多爪嘅薛家燕，將於農曆新年再度推出「家燕媽媽曲奇」，今次設計上及包裝上，家燕姐都有份參與。為令大家有一個開心嘅新年，今次家燕姐諗到買曲奇送利是，更特意印製一批自己化身財神嘅利是封，相當有意思。

踏入2021年，家燕姐再次主持《天天開運王》，前日開工時，提到賀年曲奇，家燕姐提到：「今年新年「家燕媽媽」會推出一個好靚嘅禮盒裝曲奇，係八角形，好似全盒咁，寓意住『齊齊全全、萬事順利』，裡面仲有六款唔同種類嘅曲奇，有迷你蝴蝶酥、牛油曲奇、朱古力曲奇、咖啡曲奇、黑白芝麻曲奇同埋杏仁條，包大家食得開開心心，而且八角全盒裝嘅曲奇，大家食完啲曲奇可以當全盒用，仲有家燕媽媽將會喺曲奇入面俾封利是俾大家，呢封利是好正，因為有我做財神爺嘅利是封，出面買唔到㗎！每年好多人都想要我呢封利是，排晒長龍！因為拎咗我封利是，會由年頭旺到年尾，但今年家燕媽媽特別送俾大家，仲有張$50禮券可以當錢用，希望大家食得開心，又可以行好運啦！」

禮盒設計方面，家燕姐、拍檔Francis同女兒都畀唔少意見，禮盒以家燕姐最喜歡嘅紅色加燙金，再印有家燕姐Q版樣，送禮非常大方得體，家燕姐表示：「仲可以重用又環保，希望大家會鍾意個禮盒，當然我啲曲奇係最好食嘅，大家一齊嚟嘗試同攞我封幸運利是。」家燕姐預計送出過千封利是，總值5萬元，希望大家多買多送啦！

原文鏈接：https://m.orangenews.hk/details?recommendId=148143