【識港網訊】2020年眨眼間就已經接近尾聲，JOOX今日公佈嘅2020音樂年度回顧，披露港人喺新常態下聽歌、唱K、睇音樂會以及音樂口味等方面嘅大數據。

JOOX年度回顧記錄低哂用戶喺音樂娛樂上嘅一點一滴，香港人今年嘅生活方式同以往截然不同，例如多咗時間留喺屋企並且減少社交活動，而本地用戶收聽音樂嘅習慣亦都出現咗一個小改變：喺好多打工仔WFH嘅日子，用戶聽歌嘅時間分佈比較平均，無局限喺任何時段。

到大部分港人復課復工嘅時候例如係九至十月，用戶每日聽歌嘅最高峰時間就轉為返工放工時間，即朝早8點及傍晚6點。

其他用戶聽歌數據仲有： 喺WFH嘅日子，香港用戶平均每日會聽超過20首歌，唔知係咪因為星期一至五大家都留咗喺屋企努力工作同學習，一到週末都會出外抖抖氣，所以星期六日係相對較少人聽歌 留喺屋企時間太耐

另外，煲劇睇戲可謂其中一個最受歡迎嘅Kill time活動，用戶喺2020年入面聽歌嘅總時間，係相等於連續翻煲超級英雄系列所有電影100萬次。

陳奕迅同埋容祖兒最近先後推出新歌《致明日的舞》、《是但求其愛》以及《東京人壽》成為人氣話題，而佢哋嘅其他作品依然受香港樂迷歡迎，令兩位成功冧莊成為本年度最多人收聽嘅男女歌手！

至於組合方面，Dear Jane成功登頂，摘下本地最多人收聽嘅組合第一位！

過去一年間共錄得超過59萬首K歌作品，較去年急增三倍。本年度唱得最多次數嘅五首K歌入面，有四首都同時係最多人收聽嘅歌曲。

原文鏈接：https://m.orangenews.hk/details?recommendId=145905