【識港網訊】無綫台慶臨近，綜合消息同埋深夜重播劇集所示，《使徒行者3》同埋《踩過界II》兩套合拍片將會成為今年嘅台慶劇。當中無綫同騰訊企鵝合拍嘅《使徒行者3》，今個星期初喺myTV SUPER收費版myTV Gold上架，第一集免費睇，第二集開始就要收費，足足比喺電視免費播早一個月。

中港合拍劇率先喺myTV Gold上架唔係新鮮事，絕大多數都係因為香港開播嘅日子夾唔到大陸平台，要遲啲先喺免費電視頻道播放。衡量境外播放嘅影響，無綫經常都會將呢類節目放喺OTT收費平台同大陸同步上架。

免費頻道反成發展阻力

合拍片有多啲資金，人力物力演員卡士通常都較強，放喺OTT平台率先睇會有一定吸引力。奈何畀錢訂購無綫OTT嘅人數，遠遠比起無綫喺免費頻道播放時觸及嘅觀眾數少。如果要將劇集收益賺到盡，就要喺OTT收費平台播完之後，再喺免費台播時收廣告錢。但咁做無可避免削弱觀眾喺OTT畀錢睇嘅意欲。加上喺OTT播放時如果唔夠多人睇，討論輿論推唔郁，宣傳效果唔夠強，聲勢永遠只會比起免費播放時弱。“收費OTT先播，免費頻道後播”，呢個方式無辦法谷大收費OTT嘅觀眾群。

長遠發展OTT收費平台嘅方法，只有靠OTT獨家播放嘅節目去吸客，客量大就自然有錢收。但正如上文所講，無綫既然有龐大嘅免費電視觀眾群，好難要佢自斷一臂放棄節目喺免費電視頻道播放時所帶嚟嘅收益。加上劇集投資大，用嚟推動發展收費OTT平台，對巿值愈來愈低嘅無綫嚟講亦唔係上策。

靠綜藝節目吸引觀眾畀錢？

為咗減低風險，無綫依家嘅策略係將幾個綜藝節目獨家放喺OTT收費平台播放。呢輪攻勢繼續有黃淑儀煮嘢食、伍詠薇同李丞責講風水、伍詠薇同林盛斌嘅清談訪問、馬浚偉煮咖啡同朋友傾吓偈、黎耀祥阮兆祥清談。內容乏善足陳，吸引力好低，唔好話放喺OTT收費，可能放喺免費台播都要冒一冒收視風險。

咁不如加大力度投資，做啲強勁嘅綜藝嚟提升吸引力？但咁又會跌返去同劇集一樣“要收益最大化就要放喺免費頻道播”嘅情況。明明好質素嘅節目先可以吸引到人畀錢睇，但好質素自然要提高成本，要回本就要放喺多啲觀眾嘅免費頻道，呢個死局循環令到myTV Gold做極都唔起。

要突破困局，或者要做啲免費電視唔會見到、略為踩界嘅節目。只不過無綫嘅固有觀眾群似乎又唔接受呢類玩法，要開拓新客源要又要由頭做起，成本增加。之前成日都諗唔明點解PCCW要分開“藍ViuTV”同“黃Viu”兩個OTT平台，各有各做河水不犯井水：“黃Viu”唔會播99台嘅節目，只會買外地節目、同其他地方資金合作拍節目，再放喺自己OTT平台播。“藍ViuTV”就只播免費99台可以見到嘅節目。依家睇返myTV SUPER同 myTV Gold嘅情況，或者可以明白分開做有咩好處。

原文鏈接：https://orangenews.hk/tvfongeman/139950.jhtml