【識港網訊】最近各個電視台礙於疫情關係，冇得出境拍攝旅遊節目，居然一齊火力全開，十個有八個節目都係煮嘢食，真係睇到觀眾如我好疲憊。不過都要讚吓當中應對食肆堂食禁令而產生嘅節目：ViuTV嘅《外餸》、香港開電視嘅《餓底外賣員》。

前者估計因為有外賣app贊助而綁手綁腳悶咗啲（但Kathy仔喺呢個節目嘅主持同營造氣氛技巧進步咗好多），後者就靈活抵死得多，幫觀眾試吓外賣有冇伏，計埋時，仲比較app同電話落單嘅差價，又同外賣員吹吓水。妹頭同阿正延續《臥底旅行團》嗰種好似九唔搭八但又冇離題嘅主持玩法，我覺得係近期咁多個飲食節目當中最好睇嘅一個。

《你還好嗎》展示疫情下各地生活

疫情持續至今，各地出入境限制仍然未見放鬆，喺各個電視台推出咗一輪飲食節目之後，後續有啲咩種類節目上場？ViuTV即將會播放《鬼同妳上位》，用一班女藝員去靈探做招徠。TVB播埋一早拍落嘅《這麼遠，那麼近》之後，會有《你還好嗎》，喺各地搵人拍攝返當地疫情之下嘅日常，叫做繼《外餸》同《餓底外賣員》之後最呼應返疫情嘅節目。不過放手畀各地人士拍攝，最後出到嚟嘅質素如何就有待觀察。

嘗試新題材時機

認真講句，喺呢一輪煮食節目狂攻之下，只要唔係食嘢嘅節目，我都有興趣睇吓，呢個時候係電視台試嘢嘅好時機。「偏門」啲嘅例如係精神健康題材，喺疫情影響精神緊張之下，觀眾應訃該會比平時更想知想睇，放鬆吓心神，或者可以殺出一條血路。大家留喺屋企多咗，會唔會播啲DIY裝修節目，大家可以翻新吓間屋或者家俬？又例如好似小儀、和泉素行主持嘅《酒勻全香港》咁，訪問香港品牌又得。ViuTV之前已經播過嘅節目喺疫情之下，或者可以翻生再玩多次。鍛鍊肌肉嘅《騷肌》、網購測試節目《P牌網購團》其實喺疫情之下反而仲貼近咗日常生活，包裝過再拍第二輯都未嘗不可。

又話時話，如果真係要拍煮嘢食嘅，可唔可以教吓我買一次餸，用同樣食材可以煮出唔同嘅菜式呢？咁就真係幫到手喇。

橙新聞：https://www.orangenews.hk/officelady/136762.jhtml