【識港網訊】泰國校園BL劇《2gether》嘅五集特別篇《（Still）2gether》上星期五首播，截至今個星期四晚，即係6日之後，放咗喺YouTube嘅第1集共4條片，最低click rate嗰條片有超過160萬觀看次數，最高click rate嘅一條片就有298萬觀看次數，睇嚟兩位主角Bright、Win嘅人氣會繼續保持落去。
一套青春劇，令到一入行就擔正做男主角嘅Win（21歲） 喺《2gether》2月開播至今半年時間，IG followers升至368萬。另一位男主角，喺2013年以青少年節目主持出道、拍過劇嘅Bright（23歲），亦都憑住呢套劇人氣暴升，IG followers高達511萬。BrightWin成為泰國紅人，影響力更加遍及東南亞。
GMMTV似TVB？
睇返製作同播放《2gether》嘅GMMTV，擁有自己嘅電視頻道，同時係一間藝人經紀公司，旗下設有GMMTV Records唱片公司。望落個結構係咪好面善？GMMTV同無綫非常相似。咁點解GMMTV可以一下捧紅青春素人Win，而無綫做唔到？雖則話人紅要講天時地利人和，用同一條方式唔係一定work，但必定有參考價值。撇除BL元素，《2gether》就係一套普通嘅校園愛情劇。而校園劇係畀後生演員擔正嘅好機會，因為成本相對其他劇種低好多。
校園劇各方面較易達標
校園劇場境主要喺學校，直接租學校拍攝就近乎萬事俱備。如果故事係發生喺中學嘅話，服裝主要就係校服，計埋運動衫、校隊衫、So衫都係有限錢。如果係大學嘅話，除非係貴族大學個個着名牌，否則輕裝上陣即可。劇本方面，喺校園發生嘅事當然可以超乎想像，但如果係平平淡淡老套嘢，講吓倆小無猜、情竇初開，我估唔少觀眾都已經收貨。校園係相對簡單啲嘅世界，演員嘅挑戰理應冇咁大，新演員演得愈清澀，反而愈接近普通學生嘅設定，演嘅時候比較容易達標。
高齡演員難吸引後生觀眾
除咗製作上容易達標，另一方面，後生演員擔正，可以培養一班相應後生嘅觀眾。成日話後生嘅唔睇香港電視劇，好大原因係演員平均年齡太高，演技幾出色都好，年輕觀眾好難代入搵到共鳴。以校園劇做起點，吸引年輕觀眾，等觀眾同演員一齊成長，咁先會有持續嘅支持力量。定期有穩定嘅新年輕觀眾群加入，成個行業先可以繼續發展。
近年學生戲都係副線
乜近年真係冇青春校園劇咩？嚴格嚟講真係冇，就算劇裡面有學校嘅場景橋段，都唔係主劇線。無綫日日播嘅《愛‧回家之開心速遞》、之前嘅《解決師》、上年ViuTV高討論度嘅《教束》，都唔係學生們做主角。其實將呢三套做學生嘅演員抽出嚟，開拍校園劇真係有得諗。
點解一直都唔做？首先電視台要有捧人嘅決心同信心。千祈唔好怕由零開始捧人會容易失敗，亦都唔好怕新人紅咗有毛有翼會走。一間想發展嘅公司唔應該怕人走而拒絕投資喺新員工身上，而應該令員工同公司共同進步，員工喺有得發展嘅情況下就好大機會留返低。如果員工唔想留低，好大原因係公司已經畀唔到發展空間佢。
橙新闻：https://www.orangenews.hk/tvfongeman/134686.jhtml
