【識港網訊】暑假傳統大騷《香港小姐競選》，最初因為新型肺炎疫情肆虐宣布唔搞，然後無端端話搞返，不過就變咗做網絡比賽。最近一班參選佳麗頻頻出動，喺YouTube同Facebook做直播節目，完全符合晒今年Amazing Summer嘅slogan「TVB online power線上線下同樣精彩」：無綫近年一直想將影響力擴展到網絡世界，港姐競選呢個傳統重點電視節目變成網絡節目，嘗試將觀眾由電視引去網絡平台。

網絡影片高創意彌補低製作品質

網絡世界人人有權upload自己嘅製作，拍攝剪接後製各種器材軟件豐儉由人，喺唔同網絡平台搵到嘅片，題材多元化之餘，製作質素都「多元化」，高質低質都有，不過喺網絡世界「製作質素 – 節目設計 – 受歡迎程度」未必掛勾：拍到勁靚淨係睇畫面，冇內容設計可言，都可以有click rate。拍得低質但題材夠新夠搞笑或者主持夠特色，亦可以有一大班忠實觀眾支持。不過《港姐競選》去到網絡世界就水土不服，夾住喺中間郁唔到。

主持轉達網民提問減互動感覺

其中一個港姐競選網絡節目係玩「網民interview港姐」，主持同網民出題目，出發點係增加網民同佳麗嘅互動，可惜就算係網民出題，都要透過主持先可以同港姐溝通，互動性大減。既然港姐面試都係考急才，不如叫佳麗親自回應網民提問，好過透過主持隔咗一層。另一個節目「佳麗同男藝員食飯傾偈」，同樣出現網民同佳麗冇直接互動呢個問題。

電視觀眾、網絡觀眾未能互通

仲有個網上港姐競選節目係「擺pose比賽」，網民出題可以「控制」參賽者，呢個係絕好嘅互動同埋令網民投入嘅設計，但就好唔係「香港小姐」，記得其中有條題目係「個頭中咗雀屎」叫佳麗擺個pose……如果係睇開港姐先至嚟睇呢個網上節目嘅觀眾，就會覺得勁奇怪，好容易會唔想繼續睇，無綫想透過港姐將觀眾由電視推去網絡平台，似乎做唔到。如果掉轉想吸引啲網絡觀眾去睇八月尾電視播嘅港姐總決賽，除非決賽當晚一樣係咁搞笑同九唔搭八，如果唔係呢班網絡觀眾都唔會過渡到去電視。

港姐節目瑰麗堂皇感覺成硬傷

除咗以上所講，網上播《香港小姐競選》仲有個先天硬傷，就係佢一直喺電視上都以大騷嘅資態出現，瑰麗堂皇感覺深入民心。相比起電視版本，今次網上版本大卡士藝員欠奉，就連藝員人數都少過人。最得人驚係面試同埋擺pose比賽嘅布景，直頭可以用簡陋嚟形容，連燈光都勁差，成個節目氣氛有種降級嘅感覺。

創意互動不足轉求製作質素

反觀廣告推銷節目《BigBigShop感謝祭》動用嘅藝員人數，可以話喺周六日節目當中數一數二，拍得住《流行經典50年》。一個可能喺網上出現會比較合理嘅網購推銷節目，上到電視就唔同晒身價，節目出到嚟未算精彩但總算熱鬧；一個一直喺電視以大騷姿態出現嘅選美節目，去到網絡平台就變得寒酸。近十年嚟一直有觀眾話無綫退步，但節目製作方面始終比網絡世界影片平均水平要高，以無綫名義出品嘅網上節目，如果互動做得唔好，觀眾自然會喺製作上多返啲要求，冇得避。

無綫牌頭難以慳水慳力

記得上次《萬益同心公益金》都有電視同YouTube直播，當做兩個節目分開同時做。當時喺電視播嘅就係一廠做，YouTube嗰邊嘅網上節目部分，係喺《流行都巿》同《#後生仔傾吓偈》嘅廠度拍，似返電視台製作水平。點解今次同樣係傳統大騷嘅《香港小姐競選》，去咗online做就搞成咁？唔通想試吓超低成本做出嚟喺網上播得唔得？其實一日以無綫嘅牌頭去做節目，觀眾自然會對個節目質素有底線，要慳水慳力到今次港姐網絡節目咁嘅程度，似乎行唔通。

橙新聞：http://www.orangenews.hk/officelady/system/2020/08/07/010157767.shtml