【識港網訊】有個女性朋友成日都畀男朋友喺小事上欺騙，例如明明出咗去同朋友打波，都會扮自己留喺屋企休息。又例如夜晚12點後就會扮瞓咗等等。但我朋友好肯定對方並唔係偷食，而係怕自己會嬲所以先講呢啲「善意的謊言」。朋友問：點樣先可以令對方唔再講呢啲大話？我問：你會唔會先諗下對方點解要講呢啲大話？

我呢位朋友好神經質，過分緊張另一半，覺得太夜瞓會對肝唔好、第日會無精神、會快啲死⋯⋯同朋友出街打波打太多會好攰，有時間不如休息下啦⋯⋯出發點全部都係為對方著想，但呢種過分緊張其實就會為對方造成好大壓力。

小朋友點解會呃阿媽？因為怕阿媽會嬲會鬧自己。呢個正正就係點解男朋友要講大話呃你。因為講完你又會嬲又會鬧又會好囉嗦，然後又要花好多心機去解釋去氹番你，既然係咁不如唔講真話，減少好多麻煩。

我唔係話講大話係啱，但如果想改善關係嘅話，講大話背後嘅原因就比較重要。你想對方同你講真話，你就要有聽真話嘅氣量。如果你唔想另一半覺得同你講真話係一種麻煩，咁你就要學識唔好做人阿媽，唔好過分管束對方，畀對方信心，相信你聽完真相後唔會有任何過大反應。

橙新闻：http://www.orangenews.hk/officelady/system/2020/07/22/010155894.shtml