【識港網訊】最近睇完12集韓劇《雙甲小食店》，題材唔算新鮮甚至可以話老套，講鬼神之力助人助己解決心中遺憾，CG都唔係做得好精彩，有啲對打可以話係低成本製作，但勝在演員演出感人，帶到觀眾投入氣氛。一女兩男主角格局，黃正音配陸星材、崔元英，三個演員連埋做閰羅部長嘅李準赫交流十足，連埋單元角色嘅配合，真係睇到流咗幾次眼淚。
黃正音正常發揮 陸星材演繹有變化
黃正音事隔兩年再接劇，用返佢喺《她很漂亮》嗰種大癲大肺演繹方法，演500年來背負重擔嘅月妵。呢種時瘋癲時正經嘅演法同個角色好夾，佢嘅演技係高水準，不過就少咗份新鮮感。反而演戇直青年韓江培嘅陸星材有驚喜，可愛到爆炸，睇到我不時姨母笑，同佢喺《孤單又燦爛的神-鬼怪》當中演有啲小聰明古惑嘅德華，可以話係兩個人咁。
角色成為你 / 你成為角色？
演員同角色，似容器又似水。似容器嘅演員通常有自己嘅強烈風格，將似水嘅角色倒入去自己度，將角色變成自己（第一類演員）。似水嘅演員，會當角色係容器，搵吓個容器係咩樣，然後將自己倒入容器，變成佢個樣（第二類演員）。黃正音可以話係前者，陸星材係後者。前者可觀性仍然有，但新鮮感就相對不足。後者多變化，可以期待佢有冇驚喜，或者會對作品起到化學作用。
唔夠時間 唯有照舊
一套作品，最簡單嘅配搭就係兩種演員都有，導演可以掌握到第一類演員嘅演法，心裡有數。變化大啲嘅第二類演員就可以作為試驗，增加作品嘅變化。當然如果導演功力夠嘅話，全部用晒第二類演員，出到嚟嘅變化同埋火花可能仲勁。不過就算導演有能力、肯用心去同演員一齊探索唔同演法，喺香港電視劇製作嚟講，好多時都冇咁嘅時間。或者就係因為咁，形成咗「大家照做」嘅模式。
變少少得唔得？
就算以前演法變化多端，唔少演員當遇到一個受到觀眾歡迎或者業內肯定嘅演法時，就會用返「被肯定」嘅嗰套演法去做。當見慣見熟嘅ABCDE演員都係用返一貫做法去演嘅時候，觀眾就會有種「咪又係咁」嘅感覺。如果再加埋啲老套嘅故事劇情，就冇得救……
有時見到啲演員做嚟做去都係咁嘅模式，唔知佢哋自己有咩感覺？我做觀眾就覺得有啲悶甚至有啲攰。如果真係冇時間改晒成個演法，變少少得唔得？有冇得諗諗？
橙新聞：http://www.orangenews.hk/officelady/system/2020/07/17/010155397.shtml
