[識港網訊]30集《大帥哥》播完，觀眾反應好好，已公布嘅收視都保持喺25點以上，劇中各個主要角色都爆出咁濟，就算套劇做唔到50同51周年台慶劇，氣勢都係一時無兩，爭返啖氣。當然， 一眾主要角色仲有配角們做得好，都要個靈魂人物帶得住，張衞健又再創造出多一次好成績。

張衞健風格別樹一幟

張衞健今次喺《大帥哥》繼續一貫嘅演法：似瘋帶癲，加上連珠爆發押韻得嚟但又有啲離譜嘅金句，至今都仍然係冇人能及。個人風格強烈，你可以唔鍾意，但冇可否認，張衛健仍然可以引起風潮。有觀眾留言話連佢好少睇電視嘅仔女都有追睇，佢哋話未睇過張衞健呢類咁瘋狂嘅演員，證明佢嘅演出喺新一代當中都有人buy 。另一個原因係近年真係少一啲強烈個人風格嘅電視演員，所以新一代觀眾會睇得咁過癮。

近年少有強烈風格演員

諗一諗，大台近年都真係冇一啲個人風格強烈而作品收視唔錯嘅演員出現，最近就要數到王祖藍，佢無論係喺做醒目同埋蠢鈍嘅角色，都有一種強烈嘅憨厚感。不過要數到可以喺唔同劇都保持住個人風格嘅演員，最近已經要數到黃子華。

創作演出連成一線

要喺劇裏面維持到咁強勁嘅個人風格，得一個原因，就係呢啲劇都有演員參與創作。 《大帥哥》由張衞健主力創作。《老表》系列就由王祖藍領軍，帶住一班朋友一齊去做。子華神嘅劇亦都由佢參與創作而成。遠至個人風格都係咁強烈嘅萬梓良、周星馳，都係自己不停去改劇本。位位都係集創作演出於一身嘅藝員，由劇本開始已經落力塑造個人風格，最重要係佢想點演近乎係佢哋話事，因為佢哋本身就係創作者，冇乜人可以挑戰佢哋嘅領導地位，自然可以喺劇中一展個人魅力。

重推實驗時段發掘人才

今時今日，電視台點解會唔見咗呢一款創作型嘅演員呢？當然最重要嘅條件都係講演員天份講創作力，但幾個台加埋咁多人，真係一個創作型演員都冇？似乎係冇機會多啲，又或者係藝員自己唔敢去向上司反映要做。期望電視台可以有更好嘅階梯，重推一啲實驗性質時段，可以發掘多啲幕前幕後人士嘅創作才能，要由上而下，由下而上都有常設嘅渠道，咁樣有創作有諗法嘅話，先有辦法拎出嚟傾。

創作者應主動出擊

更重要嘅係高層應該有更大嘅目光，唔好一二三線都睇收視乜都唔敢試，搞到一條橋得，一個藝員受歡迎，就無限重複，做到爛為止。須知道一日唔畀台前幕後去試，永遠都唔會有新嘢，亦都唔會再有風格強烈又獨特嘅演員出現，除非佢喺第二個領域好似電影舞台劇已經塑造出個人風格，再由電視台邀請拍劇。呢個比率唔高，因為要高層睇中又邀請嘅，萬中無一。如果唔係，你都見唔少舞台劇演員入到電視台維持唔到個人風格就知。其實電視台大可以用二線時段去試，無綫更加可以用J2，一方面可以保持有新演員新創作新幕後人員面世，另一方面可以試觀眾反應，如果得就發大嚟做，變做一線節目，對收視都有一定保障。

雖然張衞健、子華神都支持者眾，值得欣賞，但我真心希望十年之後唔好都仲係得佢哋。管理層之外，台前幕後都要努力呀，有咩創作諗法如果電視台唔批，咪自己搞完再放上網囉，到時有noise再反sell返畀上司，成數就更高啦係咪？

至於ViuTV，似乎真係一個創作自由之地，因為喺摸索階段，又冇收視壓力，可以任玩。不過睇返啲作品，真係良莠不齊，觀眾要睇較為完整嘅作品就要等。近期等到一套《做演藝嘅》，男女主角阿dee同埋胡希文都食到套劇嘅風格。不過下一套睇得嘅又唔知要等到幾時。所以正如前文所講，要有良好嘅創作階梯，去蕪存菁，方為上策。

原文鏈接：http://www.orangenews.hk/lifestyle/system/2019/01/14/010107846.shtml