【識港網訊】姜濤@Mirror與林奕匡（Phil）本是風馬牛不相及的兩位男歌手，但最近在唱片公司撮合下首度合作。二人除了合唱各自的作品外，Phil更首度擔任導師，教姜濤吹奏色風。 姜濤與Phil私底下並不認識，但因為同一個監製，在Studio偶爾會碰面外，過去也只曾在Viu TV廠房撞見。姜濤說：「喺Studio撞到但冇機會傾下偈，好多謝有今次嘅機會。」

今次得到唱片公司撮合拍片，二人除了演繹姜濤《亞特蘭提斯》及Phil《難得一遇》外，Phil更充當音樂老師即席教姜濤吹色士風。作為老師，Phil窩心地在拍攝前一日為姜濤準備全新的簧片及吹咀，而現場所見，身為學生的姜濤很用心聆聽Phil的教導，結果在短短的5分鐘內，姜濤已學識吹奏一首簡短的兒歌，速度驚人。 事後姜濤興奮表示：「其實同事問我有冇興趣學色士風，我覺得OK啊！不過睇過好多人吹，但唔知係乜嘢一回事，唔明點解吹一啖氣會有咁多音，所以未開始學時，一心諗到Phil教我已經好有壓力，但到真正開始，Phil會令你整個過程都有好多新發現，感覺好得意！」

Phil被問到這位徒弟仔表現如何，他即大讚：「好醒呀！未吹到個音已經唱到個音，而且個音仲好準添呀！哈哈！今次係我第一次教人，所以唔知係我教得啱，還是姜濤pick up得快，短短5分鐘已勉強地學咗一首歌，已經好叻！」姜濤得知Phil為自己在鏡頭奉獻了第一次，即大讚道：「你教得好好！不如我下次教返你跳舞！」 在今次短短的合作過程中，姜濤與Phil都對對方加深了認識，特別是Phil，他說：「不嬲睇相覺得姜濤外表有啲Cool，好少笑，但親身接觸後，發現佢係幾可愛，少少得意少少怕醜。」

而姜濤在入行前已很留意Phil，他分享說：「今日見面對我嚟講係好有意義，因為未入行已對Phil的歌好熟悉。我本身唔多聽廣東歌，但我係會聽Phil嘅歌，好開心有咁嘅合作機會，而且我哋都算內向又怕醜，感謝Phil遷就我講咁多嘢。」Phil聽罷即表示：「畢竟係前輩，入行都十年，要主動啲嘅，大家都怕醜就好難做節目喇！而且聽到有後輩欣賞自己嘅歌曲，或者未入行已經有聽過，有影響過你，係一件好開心嘅事。」

原文鏈接：http://www.orangenews.hk/officelady/system/2020/05/18/010149405.shtml