【識港網訊】當年黃宇詩挾著「星二代」的名銜出道，卻因自己的不懂事而未有善用自身的優勢，多年來鮮有令人印象深刻的作品，反而一宗感情糾紛卻成為全城熱話。「星二代」背負沉重的壓力，黃宇詩依舊認為這三個字是絕對的光環，更希望成為爸爸黃霑的驕傲。

心態改變

黃宇詩近日與陳圖安合作主持香港開電視新節目《滋味人生》，提到近年她主力打理內衣品牌生意，甚少現身幕前，她卻坦言不覺得自己轉至幕後，不過直認現時的心態已有所不同，因為有自己生意的關係，拍節目不再是其最主要的東西，同時亦沒有熱衷做「藝人」：「我覺得做幕前要有啲性格配合，要好鍾意表演，有表演欲，可能我不嬲唔係嗰種性格，但你問我有冇戲癮？梗係有嘅，但係走咗咁耐唔係話要做就做到，變咗我唔會刻意去搵個角色去演，玩吓就OK，但唔係真係去經營『藝人』呢樣嘢。」

不懂善用「星二代」的優勢

黃宇詩乃黃霑和華娃的幼女，打著「星二代」的頭銜，初出道已贏在起跑線，她亦認同自己有優勢所在：「人哋可能參加選美仲要勝出先知你係邊個，但我唔需要經過呢樣嘢，一定係比人優勝好多嘅，但之後嘅努力就睇造化。」然而這個光環沒有為黃宇詩帶來事業上很大的成就，回想起這些年，她坦言只怪當年自己不懂事：「其實你係霑叔個女唔易撈呀？易撈到爆啦！但唔識諗囉，成日都好戰戰兢兢，點解唔大大方方？」她續指當年在加拿大接受教育，整個人都偏向單純，加上性格不算開朗，不懂得應該更努力，或者總是不好意思接受「星二代」的名銜，導致錯失應有的優勢：「嗰陣我都唔係好希望成日講我係霑叔個女，有少少因為爸爸都唔係好想，可能佢想暗中幫但唔想幫得太出面，佢想保護我。」

因為爸爸黃霑的地位，黃宇詩在演藝路上或多或少都會受到優待，不過她坦言沒有察覺到有任何不同，反而現時做生意和日常生活卻感受到優待：「其實我係邊個啫，我只係做呢行，做主持又唔係特別出色，但係做生意嗰陣佢哋會話『你係霑叔個女』，可能已經有種好信任嘅感覺，做生意好靠個『信』字，甚至小至搭的士都會因為我係霑叔個女，啲人會容易啲同我打招呼。」

捲入感情糾紛想過離開男友

比起演出的作品，黃宇詩當年捲入的感情糾紛更加吸引大眾關注，雖然她表示事件發生的時候與男友彭慶餘是團結一致，但坦言私下絕對有掙扎過：「我覺得兩個人之間嘅感情係冇辦法由第三者嘅角度去評論，就算自己有時都未必感受到咁多，嗰時自己係有動搖過，動搖在呢段關係點樣行落去，或者點面對自己，但因為好清晰知道我同佢之間係發生緊啲咩，咪唔再諗囉，純粹調節自己嘅感受。」

這次事件令二人更認定對方，卻沒有成為他們步入婚姻的催化劑，黃宇詩坦言與男友並非想組織家庭，而是渴望有一個伴侶，所以相處方法是大家舒服便可：「我不嬲都話唔需要結婚，你個心係一齊就一齊，唔係需要一張婚書就代表你哋個心好一齊嘅，既然唔需要呢樣嘢去連繫大家嘅時候，又何必呢？」

「星二代」絕對是光環

「星二代」入行有著優勢，同時承受著不能讓父母丟架的壓力，儘使如此，黃宇詩依然認為「星二代」絕對是一個極美的光環：「呢個光環睇你點戴同戴得好唔好，我而家係幾享受嗰樣嘢。同埋老竇走咗咁耐，反而係有少少希望人哋覺得『佢係霑叔個女都幾好喎』，而唔係『搞錯呀！』。」黃宇詩續指「星二代」帶給她很多別人得不到的好處，故此要更加努力，希望成為爸爸以及家人的驕傲。

原文鏈接：http://www.orangenews.hk/officelady/system/2019/12/04/010133466.shtml