【識港網訊】Instagram（IG）、Facebook等社交平台嘅「藍剔」，對於唔少藝人嚟講都幾重要，皆因「藍剔」除咗係一個認證外，某程度上都係對你嘅身分作出肯定。不過「藍剔」唔係話你想有就有，好似歌手吳業坤一直都有申請「藍剔」，但次次都唔成功，最近佢終於如願獲得「藍剔」，原因竟然係佢改咗個人簡介？

坤哥作為一個歌手，IG嘅個人簡介自然都會寫返係歌手，而佢2015年憑《原來她不夠愛我》爆紅，甚至勇奪叱咤「我最喜愛的男歌手」，並且兩度登上紅館舞台，歌手身分應該早被認證，但坤哥卻遲遲得唔到「藍剔」，點知當佢喺簡介到將「歌手」改咗做「廢青」，神奇嘅事就發生咗。噚晚坤哥喺社交網晒出一張IG截圖，原來佢終於獲「藍剔」認證，佢仲留言：「我個profile 一直寫住歌手，申請左（咗）幾次都無藍剔，我一改左（咗）廢青唔夠一星期，得左（咗）！ #你的樣子如何 #廢青KOL」

雖然唔知點解坤哥要做「廢青」先獲得認證，但佢總算如願有「藍剔」，都係一件好事啊！

原文鏈接：http://www.orangenews.hk/officelady/system/2019/05/07/010116085.shtml