【識港網訊】二十五歲之前，我哋追求嘅係轟轟烈烈嘅愛情。我哋相信有真愛，相信兩個人係可以相親相愛八十年，相信婚姻，相信將來會望住深愛嘅人講「我願意」。到二十五歲之後，拍過幾次拖，分過幾次手，交友圈子愈嚟愈窄，自己嘅擇偶條件又愈嚟愈specific，慢慢發現搵一個對象開始一段關係都好難。然後發現自己唔再需要驚天動地嘅愛情，只想要一段平淡簡單但細水長流嘅關係⋯⋯

但係唔知點解，人愈大就愈難去同人發展細水長流嘅關係，或者係因為對愛情已經無咗細個嗰種好想做足100%，好想用盡全力去愛人嘅衝動，於是愛得有保留，同時亦都好難再迷戀一個人。慢慢愛情變得條件化，開始計較對方嘅優點缺點，計算對方嘅package，比起「能唔能夠同呢個人相愛到老」，依家開始介意嘅係「能唔能夠同呢個人相處到老」。

不知不覺間，搵真愛變成搵一個可以共渡餘生嘅伴侶。

有個朋友同新對象初次約會，事後佢話：「呢個人我無特別好愛慕，但都無反感無討厭。我覺得可以繼續試下，因為搵到個無反感嘅其實都唔容易。」呢段對白印象中我喺唔同朋友口中聽過幾次。

原來人去到某個階段，試過太多對象之後，會由「我要搵真愛」發長成「我只想搵個唔討厭嘅人」。所以先會有句說話「結婚嘅通常唔係自己最愛嘅」，將自己嘅愛情同將來幸福都一齊妥協，其實都幾可悲。

原文鏈接：http://www.orangenews.hk/officelady/system/2019/04/29/010115464.shtml