【識港網訊】藝人車廂偷食事件，我身邊好多女人都感歎「男人都係鍾意後生女」，其次就係鬧爆「點解明知對方有老婆都要痴埋去！」女人何苦為難女人呢種美德，並唔係每個女人都擁有，因為有一種女人，佢生肖係屬狐狸，以搶人老公為樂。

成日都話男人天生係獵人，其實有啲女人都一樣係獵人。佢哋鍾意考驗自己嘅魅力（又叫姣），同時非常鍾意挑戰不可能。所以佢哋鍾意向有女朋友或有家室嘅男人入手，並非出於戀父情意結，純粹出於好勝心。

你表面愈係好老公好爸爸，就愈有挑戰性。加上你老婆係天后，你哋係香港人眼中嘅金童玉女，呢種高難度挑戰係非常吸引一種屬狐狸嘅女人。佢哋嘅目的並唔係最後搶唔搶到個男人，而係搶嘅過程。「妻不如妾，妾不如偷」正正就係偷人老公嘅心態。

如果男人會因為比另一個男人優秀而覺得優越，咁女人就係會因為自己比另一個女人吸引而覺得歡愉。呢種女人佢哋證明自己魅力嘅方法，齋靠收兵已經無法滿足，佢哋要挑戰另一個女人，喺另一個女人手中靠魅力搶到獵物，從而滿足自己嘅好勝心。而有一種心理更變態嘅女人，係會進擊到去同人哋老婆做朋友。就好似縱火狂徒放完火之後，會好鍾意番去案發現場一樣，好想欣賞自己嘅「作品」。

「你驚呀？」呢句真係好多小三嘅名言。大多數男人都唔願意承認自己怕老婆，更加唔願望係異性面前顯得膽小無用。一句「你驚呀？」確實可以大到好多男人。

原文鏈接：http://www.orangenews.hk/officelady/system/2019/04/17/010114629.shtml