【識港網訊】有個女性朋友，同一個男仔一直好曖昧，兩個人嘅關係比朋友多啲，但又稱唔上戀人。呢種曖昧狀態已經超過一年，女仔試過明示暗示，希望個男仔可以有進一步行動，結束曖昧，升級做戀人。但係男仔一直拖字訣，從來無明確表示過自己嘅取態，態度曖昧。

而我哋一班朋友都一致覺得個男仔根本有心，個女仔只係花木蘭女兵，所以先會一直玩呢個曖昧遊戲。女仔聽到我哋意見之後，就一直會拋出一啲「證據」，例如：「我唔開心佢即刻打畀我呀！」「佢生日正日都約我呀！」、「佢對我好關心！」、「佢對我啲事都好上心㗎！」等等。然後我問佢「你講咁多係想說服我哋吖，定係說服自己？」

當一個人真正被愛，係唔需要喺日常生活中拼命搵小事做例子去證明。唯有一個人都懷疑呢份愛嘅時候，先需要證據去說服自己。愛情，係唔需要證據。愛情唔係一張計分表、一張check list，唔係拎住張表對番對方嘅行為剔剔剔，就可以分析到對方愛唔愛你。當有一刻你有疑惑你要去搵證據嘅時候，就證明對方根本冇表現到足夠嘅愛，冇帶畀你有足夠嘅安全感。

尤其係曖昧中嘅人，特別容易跌入呢個狀態，不停去放大對方做嘅小事，每個小動作，臉上嘅微表情⋯⋯都係想搵對方有一絲喜歡自己嘅證據。如果你感受得到，根本就唔需要刻意去搵。當你要如此落力去搵證據說服別人說服自己時，就證明，你內心根本感受唔到被愛。答案，你早已經搵到。

原文鏈接：http://www.orangenews.hk/officelady/system/2019/04/01/010113493.shtml